Луис Энрикедан бўшаб қолган «Барселона» бош мураббийи лавозимини Эрнесто Вальверде эгаллади. Мураббийни расман таништириш маросими 1 июнь куни бўлиб ўтади.
Вальверденинг клуб рулига келаётгани ҳақидаги хабар бир ҳафта муқаддам чиқиб бўлган, мутахассиснинг ўзи Бильбаонинг «Атлетик» клубини тарк этганди. «Барселона» Испания кубогида зафар қучиб, Луис Энрике клуб билан хайрлашгач, жамоа президенти Хосеп Мария Бартомеу махсус матбуот анжуманида Вальверденинг ташрифи ҳақида расман маълум қилди.
Ҳозир Вальверде жуда бахтиёр. Унда жамоа билан ижобий натижа қайд этиш учун барча фазилатлар мужассам. Эрнесто ёшлар футболини яхши кўради. Энг асосийси унинг қарашлари «Барселона» ўйин услубига мос келади.Хосеп Мария Бартомеу, «Барселона» президенти
53 ёшли Эрнесто Вальверде 1988—1990 йиллар давомида футболчи сифатида «Барселона» шарафини ҳимоя қилган. Ўз вақтида у «Эспаньол», «Олимпиакос», «Вильярреал», «Валенсия» каби клубларни бошқарди. Мураббий 2013 йил Бильбаонинг «Атлетик» клуби билан шартнома тузиб, шу вақтга қадар жамоани бошқарди.
Вальверде «Олимпиакос» билан уч бор Греция чемпионлигини ва икки марта мамлакат кубогини қўлга киритган. 2015 йил «Атлетик» билан Испания Суперкубогида зафар қучган. Ўшанда Вальверде шогирдлари «Барселона»ни биринчи учрашувда 4:0 ҳисобида таслим қилган, жавоб ўйинида эса 1:1 ҳисоби қайд этилганди.
«Барселона» ва Вальверде ҳамкорлиги 2 йилга мўлжалланган.
Изоҳ (0)