28 апрель куни Ўзбекистон Президенти девонининг Жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизматининг Тошкент шаҳри Мирзо Улуғбек туманидаги сайёр қабулида аҳолидан табиий газ бўйича асоссиз қарздорликлар ҳисобланаётгани ҳақида кўп мурожаат келаётгани, бу масалани комплекс ўрганиб чиқиш, муаммонинг илдизини топиш ва бартараф этиш лозимлиги таъкидланди. Бу ҳақда ЎзА хабар бермоқда.
Сайёр қабулда бу борадаги қатор мурожаатлар кўриб чиқилди. Хусусан, Мирзо Улуғбек тумани 4-берк Турон кўчаси 6-уйда яшайдиган Асадилло Розиқовнинг айтишича, 2016 йилнинг сентябрида табиий газ ходимлари унинг хонадонида хатлов ўтказиб, икки миллион сўмдан ортиқ қарз ҳисоблаган.
Унга бу қарз 2010 йил табиий газ ҳисоблагичини қиёслов кўригидан ўтказилгани ҳақидаги сертификат белгиланган муддатдан кеч олингани билан изоҳланган.
«Модомики, шундай бўлган тақдирда ҳам, орадан етти йил ўтиб кетган, лекин ўша вақтда ҳисоблагич ишлаган, унга асосан барча тўловни тўлаганмиз, буни исботлайдиган барча квитанция, мана, қўлимда турибди, боз устига 2015 йил шу ҳисоблагични яна белгиланган қоида-талаблар асосида ўз вақтида қиёслов кўригидан ўтказганман, яхши ишлаяпти, — деди А.Розиқов. — Хўш, табиий газ ходимлари ишлаётган ҳисоблагични носозга чиқариб, қарз ҳисоблаши мумкинми? Нега ўша вақтда буни менга тушунтиришмаган? Уларга бу борада нима ҳалал берган?»
Мирзо Улуғбек тумангаз фойдаланиш хизмати бошлиғи Алишер Бойхонов фуқаро билан бирга масалани жойида ўрганадиган бўлди. Айтилишича, бу қарздорлик нотўғри ҳисобланган бўлса, дарҳол бекор қилинади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)