Озарбайжон ОАВлари Марказий сайлов комиссияси ўтказаётган тадбирларга эътибор қаратди

Ўзбекистон Республикаси Президенти сайловини ташкиллаш жараёни хорижий давлатлар ОАВлари томонидан кенг ёритилмоқда. Жумладан, Озарбайжоннинг Trend ва Report ахборот агентликлари веб-сайтларида ўқувчиларни мазкур мавзу билан таништирувчи мақолалар жойлаштирилди. Бу ҳақда «Жаҳон» ахборот агентлиги хабар бермоқда.

Мақолаларда Ўзбекистонда рўйхатдан ўтган барча тўрт сиёсий партия президентлик сайловларида иштирок этишга қўйилгани, уларга буни тасдиқловчи тегишли ҳужжатлар тақдим этилгани билдирилган.

Электрон нашрлар Тошкентда Марказий сайлов комиссияси томонидан округ сайлов комиссиялари учун онлайн семинар-тренинг ўтказилганини эслатиб ўтди. Мазкур семинар-тренинг сайлов қонунчилиги бўйича билимларни мустаҳкамлаш, уларни округ комиссияларининг сайловларга тайёргарлик ва уларни ўтказиш жараёнида қўллаш масалаларига бағишлангани қайд этилди.

Марказий сайлов комиссияси конституциявий орган мақомига эга эканлиги, давлат ҳокимияти тизимида алоҳида ўрин эгаллаши, ҳокимият органлари аралашувисиз сайловлар ташкилланиши ва ўтказилишини таъминлаши таъкидланди.

Президентлик сайлови ошкора ва очиқ тарзда ўтиши учун ОАВ вакиллари аккредитациядан ўтказилаётгани, халқаро кузатувчиларга таклифномалар жўнатилгани хабар қилинди.