Кувайт Рио–2016 Олимпиада ўйинларидан четлатилди
Кувайт мамлакати Халқаро олимпия қўмитасига (ХОҚ) қарши суд жараёнида ютқазди. Мазкур давлат вакиллари ХОҚдан 886 миллион евро товон пули талаб қилиб чиққан эди. Бу ҳақда «Qalampir.uz»га таяниб, «Stadion.uz» хабар бермоқда.
Швейцариянинг Ваадт кантони суди Кувайтнинг даъвосини қониқтирмади. Ушбу араб давлати ўзининг барча спорт туридаги терма жамоаларининг дисквалификация қилингани ва Бразилиядаги Олимпиада ўйинларидан четлатилгани учун товон пули берилишини сўраб чиққан.
«Кувайтда суд қарорига қарши шикоят учун 30 кун вақт бор, шунингдек, у барча суд харажатларини қоплаши керак бўлади», – дейилади хабарда.
Мамлакат терма жамоасининг мусобақалардан четлатилиш сабаби сиёсатнинг спортга аралашувидир. Кувайт спортчилари ўз давлатлари байроғи остида иштирок эта олмайди. Аммо халқаро спорт федерациялари тасдиқласа, улар Олимпиада байроғи остида қатнашиши мумкин.
