Mercedes-Benz C-Class кабриолети суратлари премьерадан аввал тарқалиб кетди

Интернетда Mercedes-Benz C-Class кабриолетининг серияли версияси акс этган видео пайдо бўлди, деб ёзади Motor. Жосуслар Mercedes корхонаси яқинидаги автотураргоҳда тўхтаб турган машинани суратга олди. Автомобилнинг очиқ версияси 29 февраль куни илк бор тақдим этилади.

Машинанинг олд қисмини суратга тушира олишмади, аммо кадрга унинг бир йўла икки хил — кулранг ва кўк рангдаги версиялари тушди. Ҳар иккала автомобиль ҳам йиғиладиган юмшоқ томга эга.

Бундан ташқари, Mercedes компанияси C-Class кабриолетининг расмий тизерини чиқарди, унда AirCap ва AirScarf тизимлари қандай ишлашини кўриш мумкин. AirCap олд ойна тепасида кўтариладиган махсус соябон, AirScarf эса ҳаво қувури бош тирагичига ўрнатилган «ҳаво шарфи»дир.