Қодировни истеъфога чиқариш талаб қилинган аризани тўққиз мингдан ортиқ киши имзолади
Қодировнинг истеъфога чиқарилиши талаб қилинган аризани тўққиз мингдан ортиқ киши имзолади, дея хабар бермоқда TJournal.
Ҳужжатни имзолаганлар орасида ҳуқуқ муҳофазачилари Людмила Алексеева ва Лев Пономарёв, ёзувчилар Владимир Войнович, Людмила Улицкая, Мариэтта Чудакова, сиёсатчилар Леонид Гозман ва Андрей Пионтковский, режиссёр Владимир Мирзоев, журналист Дмитрий Муратов ва бошқа таниқли кишилар бор.
Қодировни истеъфога чиқариш ҳақидаги ариза унинг 12 январь куни «тизимдан ташқаридаги мухолифат вакилларига халқ душманлари, хоинлар каби муносабатда бўлиш», «бундай кишиларни уларнинг қўпорувчилик фаолияти учун суд қилиш»га даъват этиб ёзган гаплари юзасидан берилди.
«Тинч жамоатчилик-сиёсий фаолликда иштирок этганлик учун хоинлик ва қўпорувчилик ҳаракатида айблаш тўғридан-тўғри таҳдид хусусиятига эга», — дейилади ҳужжатда.
Шунингдек, унда Рамзан Қодиров бунгача ҳам Россия Федерацияси қонунларига бутунлай эътиборсизлигини кўп бор намойиш этгани, у раҳбарлик қилаётган Чеченистон Республикасида ҳар қандай танқид маънавий ва жисмоний зўравонлик билан жазоланиши ҳақида айтилади. Қодировнинг баёноти мамлакатда фуқаролар томонидан ҳуқуқ ва эркинликлар амалга оширилиши борасида жиддий таҳдидни юзага келтириши таъкидланади ҳамда у ўз лавозимидан зудлик билан четлатилиши зарурлиги айтилади.
Аввалроқ Қодиров тизимдан ташқари мухолифат ҳақидаги баёнотида Россияни тарк этиб, у ерда туриб, мамлакатнинг обрўсини тўкаётганларни назарда тутганига аниқлик киритган эди.
Россия президенти ҳузуридаги Инсон ҳуқуқлари бўйича кенгаш 12 январь куни мухолифатни «халқ душманлари» дея атаган Чеченистон раҳбари Рамзан Қодировнинг сўзларини лингвистик экспертизага жўнатиши хабар берилган эди.
