АҚШда автомобиль Меҳнат кунига бағишланган парад иштирокчиларини уриб кетди

7 сентябрь, душанба куни АҚШнинг Иллинойс штати Уэствилл шаҳрида Меҳнат куни (Labor Day) муносабати билан уюштирилган парад иштирокчиларини автомобиль уриб кетди, дея хабар бермоқда «TAСС».

Маҳаллий ҳукумат вакиллари маълум қилишича, ҳодиса натижасида 11 киши шикастланган, улар орасида 2, 4, 10 ва 13 ёшли болалар ҳам бор.

Жабрланганларнинг барчаси эҳтиёт юзасидан касалхонага ётқизилди. Шифокорлар уларнинг ҳаёти хавф остида эмаслигини айтди.

Автомобиль ҳайдовчиси, 61 ёшли аёл ҳам лат еди. У нима учун оломон орасига автомобиль билан бостириб боргани номаълум, бунга соғлиғига алоқадор муаммо сабаб бўлган бўлиши мумкин. Полиция ҳодиса юзасидан текширув бошлади.