Муддатли ҳарбий хизматни ўтаган аскарлар 27 фоизлик имтиёз учун тест синовларини топширмоқда
Ўзбекистон Республикаси Мудофаа вазирлиги ҳарбий қисм ва муассасаларида муддатли ҳарбий хизматни ўтаётган ёшлар давлат тест синовларини топширмоқда. Бу ҳақда Ўзбекистон Миллий ахборот агентлиги хабар берди.
Мазкур тест синовлари ҳарбий қисмлар қўмондонлигининг мамлакатимиз олий таълим муассасаларига имтиёзли асосда ўқишга кириш имконини берадиган тавсияномасини олиш учун номзодларни саралашнинг якуний босқичидир.
Президентимиз Ислом Каримовнинг 2012 йил 31 майдаги «Ўзбекистон Республикаси Қуролли Кучлари сафида муддатли ҳарбий хизматни ўтаб бўлган фуқароларга имтиёзлар тизимини такомиллаштиришга оид қўшимча чора-тадбирлар тўғрисида»ги қарори муддатли ҳарбий хизматни ўтаб бўлган ҳарбий хизматчиларга мамлакатимиз олий таълим муассасаларига ўқишга кириш учун тавсияномалар беришда тегишли тартиб ўрнатиш ҳамда уларга берилаётган имтиёзларнинг рағбатлантирувчи омилларини кучайтиришдек эзгу мақсадларга йўналтирилгани билан аҳамиятлидир.
Қарорда тегишли тавсияномага эга бўлган фуқаролар барча йўналиш ва мутахассисликлар бўйича мамлакатимиздаги олий ўқув юртларига ўқишга киришда тўплаш мумкин бўлган энг юқори баллнинг 27 фоизи миқдорида қўшимча балл шаклидаги имтиёзга эга бўлади. Номзодлар бундай тавсияномани олиш учун жанговар ва маънавий-маърифий тайёргарлик, ҳарбий интизом ва тест синовлари натижалари бўйича энг кўп балл тўплаши зарур.
Муддатли ҳарбий хизматни ўтаётган ҳарбий хизматчиларга Ўзбекистон Республикаси олий ўқув юртларига кириш учун тавсиянома бериш тартиби Мудофаа, Ички ишлар вазирликлари ҳамда Миллий хавфсизлик хизматининг қўшма қарорига биноан тасдиқланган махсус низом билан белгиланган. Ўзбекистон Республикаси Вазирлар Маҳкамаси ҳузуридаги Давлат тест маркази ҳарбий хизматчиларнинг жанговар ва маънавий тайёргарликка оид дастурларни ўзлаштириш даражаси ва билимини якуний баҳолаш учун масъул этиб тайинланган.
Тошкент олий умумқўшин қўмондонлик билим юртида Тошкент ҳарбий округининг ҳарбий қисм ва муассасаларида муддатли ҳарбий хизматни ўтаётган юрт посбонлари биринчилардан бўлиб ўз билимини синаб кўрди.
Тест синовлари мавзуга оид уч йўналиш – умумҳарбий, маънавий-маърифий тайёргарлик ва мантиқий саволлардан иборат. Намунавий тест саволларида ҳарбий хизматчиларни тайёрлаш дастурлари, уларнинг жанговар-хизмат фаолиятининг ўзига хос хусусиятлари эътиборга олинган. Тест синовлари натижалари тегишли текширувдан ўтказилгач, ҳарбий қисм қўмондонлигига юборилади ва айнан шу маълумотлар жорий йил март апрель ойларида муддатли ҳарбий хизматчиларни резервга бўшатиш жараёнида тавсияномалар беришда муҳим ўрин тутади.
Тест синовлари мамлакатимизнинг бошқа ҳудудларида ҳам давом этмоқда.
