Россиянинг Жаҳон чемпионати — 2026ни ўтказишда Қозоғистонга ёрдам беришга тайёр экани маълум қилинди

Жаҳон чемпионати — 2018 ташкилий қўмитаси бош директори Алексей Сорокин Қозоғистон Россияга ЖЧ — 2026ни ўтказиш бўйича ёрдам сўраб мурожаат қилмаганини маълум қилди, деб хабар беради «Stadion.uz».

Эслатиб ўтамиз, ЖЧ — 2026 мусобақасини ўтказиш учун Қозоғистон номзодини қўйиши мумкинлиги ҳақида мамлакат футбол федерациясининг собиқ (13 декабрь куни истеъфо берган) президенти Адилбек Жақсибеков маълум қилган эди.

Хитой, Эквадор, Колумбия, Канада, Мексика ва АҚШ давлатлари ҳам ЖЧни ушбу йилда ўзида ўтказиш истагини билдирган.

«Бизга Қозоғистон футбол федерациясидан ҳеч ким мурожаат қилмади. Аммо Қозоғистонга ариза беришни ташкиллаштириш юзасидан ёрдам керак бўлса, биз тайёрмиз ва уларга омад тилаймиз», — деди Сорокин.