Нукусда Соғлом бола йилига бағишлаб «Соғлом авлод илҳомлари» кўргазмаси очилди. Унда 33 нафар ёш ижодкорнинг 150 га яқин графика, мойбўёқ, амалий санъат асарлари, декоратив композициялари, каштачилик маҳсулотлари намойиш этилмоқда. Бу ҳақда ЎзА хабар берди.
Кўргазмада намойиш этилаётган Нукус шаҳридаги 1-болалар мусиқа ва санъат мактаби ўқувчилари: Ерназар Айтековнинг «Ёмғирли кун», Расул Айтмуратовнинг «Қоратов», Алланиёз Ўтениязовнинг «Кашта», «Ёш оила», «Овул манзараси», Ислом Ўрозбоевнинг «Қайиқлар», Навбаҳор Дусенбоеванинг «Ассалом, Наврўз!», Динара Мақсетованинг «Алла», Ойбек Машариповнинг «Йўлда», Ермағамбет Пирмағамбетовнинг «Булоқ», «Кўл бўйида» асарлари мутахассислар томонидан юқори баҳоланди. Амалий санъат асарлари, миллий каштачилик маҳсулотлари томошабинларда катта таассурот қолдирди.
– Ўзбекистон Бадиий академияси ташаббуси билан ўтказилаётган «Тасвирий санъат фестивали» доирасида ташкил этилган кўргазма кўплаб ёш иқтидорларни кашф этмоқда, – дейди Бадиий академиянинг Қорақалпоғистон Республикаси бўлими раҳбари Г. Изентаева. – Тадбир доирасида таниқли мусаввирлар ёш рассомларга тасвирий санъат сирларидан сабоқ бермоқда. Шунингдек, Ажиниёз номидаги Нукус давлат педагогика институти, Қорақалпоқ давлат санъат ва маданият коллежи, Ўзбекистон Республикаси Бадиий академияси Қорақалпоғистон Республикаси бўлими ҳузуридаги ихтисослашган санъат мактабида таниқли мўйқалам соҳиблари билан учрашув ва кўргазмалар ташкил этилмоқда.
Изоҳ (0)