Британия ҳукумати «гриппга қарши бефойда дори воситалари» учун 600 миллион фунт-стерлинг сарфлаб юборди. Бу ҳақда «Кочрейн ҳамкорлиги» (Cochrane Collaboration) мустақил тадқиқот ташкилоти маълумотларига асосланиб, The Independent хабар бермоқда.
Газетанинг қайд этишича, Бирлашган Қироллик ҳукумати пандемия юз бериши эҳтимолини ҳисобга олиб, 40 миллион доза Tamiflu ва Relenza препаратларини сотиб олган. Бироқ маълум бўлишича, ушбу воситалар парацетамолдан ҳеч бир жиҳати билан яхшироқ эмас. Бундан ташқари, ушбу дори воситалари пандемия олдини ололмайди.
Экспертларнинг сўзларига кўра, Tamiflu ва Relenza’ни ишлаб чиқарувчи компаниялар бу дориларнинг самарасиз эканлигини кўрсатиб берган клиник тестлар билан боғлиқ муҳим ахборотни яширган.
Олимлар, шунингдек, тестлар тўғрисидаги батафсил ахборотларнинг тақдим этилишини талаб қилмагани учун, дори воситаларини назорат қилишга масъул бўлган давлат органларини ҳам танқид остига олган, деб ёзади «Кун».
Мутахассислар Британия ҳукуматига сақлаш муддати якунига етаётган препаратлар ўрнига Tamiflu ва Relenza сотиб олмасликни тавсия қилган.
Изоҳ (0)