Ozodbek Nazarbekovdan Botir Qodirovgacha: O‘zbek shou-biznesidagi eng serfarzand mashhurlar (foto)

Bir necha kundan beri so‘z ustasi Valijon Shamshiyevning 12-marotaba ota bo‘lganligi haqidagi xabar ijtimoiy tarmoqlarda keng muhokama qilinmoqda. Qiziqchi o‘zbek shou-biznesining eng serfarzand vakillaridan biri, biroq bu borada birinchilik xonanda Botir Qodirovda. Quyida besh va undan ko‘proq farzandlarni tarbiyalayotgan o‘zbekistonlik mashhurlar haqida so‘z yuritiladi. 

Nilufar Usmonova 

O‘zbekiston xalq artisti Yulduz Usmonovaning yolg‘iz farzandi xonanda Nilufar Usmonova bolaligidan katta oilasi bo‘lishini orzu qilgan. Shuning uchun ham bugun u besh farzand — uch o‘g‘il va ikki qizning onasi. Nilufar Usmonova shaxsiy hayotini doim muxlislaridan sir tutgan. U birinchi marta turmush qurganida juda yosh bo‘lgan.

Xonanda intervyularidan birida hayotida bir martagina rasman turmush qurgani haqida so‘zlab bergan. Shuningdek u ayni paytda farzandlariga ham ota, ham ona ekanligini ta’kidlab o‘tgan. Nilufarning to‘ng‘ich o‘g‘li Saida’zamxon ayni paytda Londondagi oliy o‘quv muassasalaridan birida tahsil olmoqda. Xonanda farzandi ishlab pul topa boshlagach, uni uylantirib qo‘yishi haqida aytib o‘tgan.  

Nigina Nabiyeva

2000-yillarda “Olmali aymoqcha” qo‘shig‘i bilan tanilgan xonanda Nigina Nabiyeva 2025-yilda egizak farzandlarni dunyoga keltirdi hamda o‘zbek shou-biznesidagi eng serfarzand ijodkorlardan biriga aylandi. Nigina hozirda to‘rt o‘g‘il va ikki qiz — jami olti farzandning onasi hisoblanadi. 

Nigina Nabiyeva turmush o‘rtog‘ining ishi sababli bir necha yil AQShda yashadi. Hozirda u oilasi bilan Toshkentga qaytgan. Xonanda farzandli bo‘lishidan avval bir nechta yangi qo‘shiqlarini muxlislari e’tiboriga havola etdi. 

 Jahongir Poziljonov

2008-yilda bo‘ydoqlar safini tark etgan “Bojalar” guruhi yakkaxoni Jahongir Poziljonov ham serfarzand xonandalardan biri hisoblanadi.

“Boyvachcha” filmini suratga olish jarayonida tanishgan Jahongir Poziljonov va Dildoraxonning ikki o‘g‘il hamda uch qizi bor. Xonanda to‘ng‘ich o‘g‘liga G‘ayratjon, deya otasining ismini, yana biriga esa marhum do‘sti Mo‘min Oripovning ismini qo‘ygan.

Ozodbek Nazarbekov

 O‘zbekiston madaniyat vaziri, taniqli xonanda Ozodbek Nazarbekov sakkiz farzandning otasi hisoblanadi. Xonanda uch qizini turmushga bergan, to‘ng‘ich o‘g‘li Ja’farni uylantirgan. Uning bir nechta nevarlari bor. 
Ozodbek Nazarbekov 2022-yilda ijtimoiy tarmoqlardagi chiqishlari bilan mashhur bo‘lgan Shukurjon domla Egamberdiyevning (Shukurulloh domla) qizi Marziyaxonni o‘g‘li Ja’farga kelin qilgan. Ushbu to‘yda ko‘plab o‘zbekistonlik mashhurlar ishtirok etgan edi.
 

2023-yilda Ozodbek Nazarbekov qizi Zinnurani xonanda Yorqinxo‘ja Umarovga uzatdi. Ushbu to‘y ham shou-biznesning eng taniqli vakillari ishtirokida nishonlandi. 

2024-yilning yozida Yorqinxo‘ja Umarov va Zinnura Nazarbekova ilk marta ota-ona bo‘lishdi.
 

35 yoshli kinoaktyor Yigitali Mamajonov besh farzandning otasi hisoblanadi. Uning xonanda Rayhon bilan nikohidan Islom va Imron ismli egizak o‘g‘illari, ikkinchi turmushi Nigina ismli ayoldan qizi bor.

2018-yili aktrisa Muqaddas Sa’dullayevaga uylanganini ommaga ma’lum qilgan Yigitali Mamajonovning uchinchi turmushidan Abubakr va Hadicha ismli farzandlar dunyoga kelgan. U hozirda Muqaddas Sa’dullayeva bilan baxtli turmush kechirmoqda.

Hamid Toshpo‘latov

“Mehmonjonlardan aylanay” serialidagi roli orqali ko‘pchilikka yaxshi tanish aktyor, O‘zbekistonda xizmat ko‘rsatgan artist Hamid Toshpo‘latovning o‘zi ham serfarzand oilada tug‘ilgan. U o‘n ikki nafar farzandning biri hisoblanadi. Aktyorning besh qiz va ikki o‘g‘il farzandi, ko‘plab nevaralari bor.

Muhammadjon Bobojonov

Asosan komedik janrdagi rollari bilan tanilgan aktyor Muhammadjon Bobojonov o‘zbek shou-biznesida eng serfarzand otalardan hisoblanadi. Chunki uning olti nafar qizi va bir o‘g‘li bor.

Erkin Komilov

O‘zbekiston xalq artisti Erkin Komilov umri davomida uch marta oila qurgan. Ikki ayoli hayotdan erta ko‘z yumgan. Uning uch turmushidan besh qiz va ikki o‘g‘il farzandi bor. Ustoz san’atkor hozirda Mahbubaxon ismli turmush o‘rtog‘i bilan birga yashaydi. Ularning o‘ndan ziyod nabira va chevaralari bor.

Jahongir Otajonov

Xonanda Jahongir Otajonov shu kungacha olti marta oila qurgan. U sakkiz nafar farzandi borligini va ularning bari bilan yaxshi aloqada ekanligini aytib o‘tgan.  

“Olti marta uylanib, ajrashganman. Birinchi turmushimdan 19 yoshli qizim bor, u hozir onasi bilan Germaniyada yashaydi. Ikkinchi turmushimdan uch nafar farzandim bor, ularga qarayman. Uchinchi turmushimdan bir o‘g‘lim bor, aliment oladi. To‘rtinchi turmushimdan ham bir o‘g‘lim bor, u ham aliment oladi. Beshinchi turmushimdan bir qizim bor, unga qarayman. Oltinchi turmushimdan bir o‘g‘lim bor, u bilan umuman munosabatim yo‘q. Gohida ko‘rishib turaman. O‘g‘lim ikki yosh bo‘lgan hozir”, — degan edi xonanda intervyularidan birida.

Valijon Shamshiyev

So‘z ustasi Valijon Shamshiyev 1998-yilda O‘zbekiston xalq artisti Erkin Komilovning Dilfuza ismli qiziga uylangan. Ularning to‘yi ikki marta Andijon va Toshkent shaharlarida katta dabdaba bilan nishonlangan. Juftlik yetti nafar farzand ko‘rgan, ularning turmushi 20 yil davom etgan. Valijon Shamshiyev Dilfuza Komilova bilan 2018-yilda ajrashgan. Shundan so‘ng qiziqchi yana bir bor turmush qurgan. Hozirda Valijon Shamshiyevning umumiy hisobda 12 nafar farzandi bor. 



Botir Qodirov

Oilada yolg‘iz farzand bo‘lgan Botir Qodirovning 15 ta farzandi bor. Tog‘ri, ularning onasi bir emas, ammo xonanda farzandlari bir-birini yaxshi tanishi haqida aytib o‘tgan.

— Farzandlarimning bari bir-birini tanishadi va do‘stona munosabatda bo‘lishadi. Boshqa oilamdan bo‘lgan farzandlarim birinchi oilamga kelib, bemalol o‘ynashadi. Farzandlarim uchun, albatta, vaqt ajrataman. Ularning barini yig‘ib, istirohat bog‘iga yoki ovqatlanishga olib boraman, — degandi xonanda intervyularining birida.