Rossiya Ukraina poytaxti Kiyevga 31-iyul kuni raketa va dronlar bilan yirik hujum uyushtirdi. Oqibatda halok bo‘lganlar soni bugungacha 31 nafarga yetgani ma’lum qilindi. Bu haqda Euronews xabar berdi.
Ukraina Ichki ishlar vazirligi ma’lumotlariga ko‘ra, Ukraina poytaxtining bir qancha hududlariga berilgan zarba qurbonlari orasida 5 nafar bola, jumladan, 2 yoshli bola ham bor. Yana 159 kishi, jumladan 16 bola jarohatlangan. Mamlakat prezidenti Vladimir Zelenskiy ushbu hujumni “qabihlik”ka yo‘yib, bu Rossiyaga nisbatan bosimni kuchaytirish va yangi sanksiyalar joriy etish zaruratini oshirishini ta’kidlagan.
“Iyul oyining o‘zida Rossiya Ukrainaga qarshi 5 100 dan ortiq havo bombasidan, 3 800 dan ortiq ‘Shahed’ dronidan va 260 ga yaqin raketadan — ulardan 128 tasi ballistik — foydalandi. Buni faqat AQSH, Yevropa va boshqa xalqaro kuchlarning birgalikdagi harakatlari to‘xtata oladi”, dedi Zelenskiy.
Ukraina harbiy-havo kuchlarining ma’lum qilishicha, 31-iyulga o‘tar kechasi Rossiya tomonidan 309 ta dron va 8 ta raketa uchirilgan. Havo hujumidan mudofaa tizimi ularning aksariyatini urib tushirishga muvaffaq bo‘lgan, biroq Kiyev shahri bir nechta qanotli raketalar zarbasiga uchragan.
Kiyevdagi 9 qavatli turar joy binosining katta qismi qulab tushgan. Vafot etganlar orasida yuqori lavozimli politsiya leytenanti Liliya Stepanchuk ham borligi ma’lum qilingan. Sviatoshinskiy va Solomyanskiy hududlari eng ko‘p zarar ko‘rgani aytilmoqda. Hujum oqibatida maktab, bolalar bog‘chasi, shifoxona va oliy o‘quv yurti binolari ham zarar ko‘rgan. Kamida 37 kishi o‘z uyidan ayrilgan.
AQSH prezidenti Donald Tramp Rossiya rahbari Putindan Ukrainaga o‘t ochishni to‘xtatishishini bir necha bor talab qilganiga qaramay, Moskva hamon hujumlarni to‘xtatgani yo‘q.
Tramp 29-iyul kuni Moskvadan tinchlik sulhiga erishishini so‘rab, unga 10-12 kun muddat bergan. Undan oldinroq esa bu muhlat 50 kunni tashkil etardi. AQSH rahbari agar Putin Ukrainaga qarshi keng ko‘lamli urushni hech bo‘lmaganda vaqtincha to‘xtatishga rozi bo‘lmasa, mamlakatga nisbatan yanada og‘irroq sanksiyalar qo‘llash bilan tahdid qilmoqda.
Izoh (0)