Vazirlar Mahkamasining 22-iyuldagi qarori bilan yer qa’ridan foydalanish qoidalarini buzish bilan bog‘liq huquqbuzarliklar haqida xabar bergan jismoniy shaxslarni pul mukofoti bilan rag‘batlantirish tartibi to‘g‘risidagi nizom tasdiqlandi.
Nizomga ko‘ra, huquqbuzarlik videotexnika vositalari orqali qayd etilishi hamda “Geomonitoring” tizimi orqali Tog‘-kon sanoati va geologiya sohasini nazorat qilish inspeksiyasiga yuborilishi lozim.
Foto va video materiallarda quyidagilar aks ettirilishi kerak:
- sodir etilgan huquqbuzarlik;
- huquqbuzarlik sodir etgan shaxs to‘g‘risidagi ma’lumotlar (agar mavjud bo‘lsa);
- huquqbuzarlik sodir etilgan manzil, sana va vaqt.
Fuqaro foto va videomateriallarni ushbu axborot tizimiga yuborishda quyidagilarni to‘liq ko‘rsatishi lozim:
- ismi, familiyasi, otasining ismi, doimiy yashash manzili;
- uyali telefon raqami, bank plastik kartasi raqami va elektron manzili;
- huquqbuzarlik sodir etilgan joy, sana va vaqt;
- huquqbuzarlik sodir etgan shaxs to‘g‘risidagi ma’lumotlar (agar mavjud bo‘lsa).
Foto va video materiallar 15 ish kunida ko‘rib chiqiladi.
Ularni yuborgan shaxslar quyidagi miqdorlarda pul mukofoti bilan rag‘batlantiriladi:
- keng tarqalgan noruda foydali qazilmalarni qonunga xilof ravishda qazib olish yoki boshqa joyga tashish bo‘yicha — huquqbuzardan undirilgan mablag‘lar hisobidan BHMning 1 baravari (375 ming so‘m, 1-avgustdan — 412 ming so‘m);
- foydali qazilmalarni qazib olish, mineral xomashyoni qayta ishlash sohasidagi boshqa huquqbuzarlik bo‘yicha — huquqbuzardan undirilgan jarima miqdorining 5 foizi.
Huquqbuzarliklar aks ettirilgan foto va videomateriallarga har qanday tarzda o‘zgartirish kiritish taqiqlanadi. O‘zgartirish kiritilgan foto va videomateriallar ko‘rib chiqilmaydi. Hajmini kichraytirish maqsadida videoyozuvning bevosita huquqbuzarlik aks ettirilgan qismini kesib olish bundan mustasno. Qoida tariqasida, videoyozuvning davomiyligi 120 soniyadan oshmasligi lozim.
O‘zbekistonda yer qa’ridan foydalanish qoidabuzarliklari haqida xabar bergan fuqarolar pul mukofoti olishi “Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi faoliyatini samarali tashkil etish chora-tadbirlari to‘g‘risida”gi prezident qarorida belgilandi.
Izoh (0)