O‘zbekistonda yil boshidan soliq huquqbuzarliklari haqida 54 mingdan ortiq murojaat kelib tushdi. Bu haqda Soliq qo‘mitasi ma’lumotlarida keltirilgan.
Unga ko‘ra, 2025-yilning yanvar—iyun oylarida “Soliq” mobil ilovasining “Soliq hamkor” tizimi orqali soliq huquqbuzarliklari haqida 54 401 ta murojaat kelib tushgan.
Shundan:
- 49 015 tasi xarid cheki bermaslik;
- 1 898 tasi to‘lovni plastik karta orqali qabul qilmaslik;
- 126 tasi plastik karta uchun xarid summasini oshirish;
- 3 362 tasi boshqa turdagi huquqbuzarlik holatlari bo‘yicha.
Murojaatlarning 26 155 tasi takroriy bo‘lgani yoki shikoyat kelib tushgan tadbirkorlik subyektida tekshiruv davom etayotgani sababli ko‘rib chiqilmagan. Murojaatlar asosida 21 702 ta sayyor soliq tekshiruvi o‘tkazilib, 99,1 foiz holatda huquqbuzarlik tasdiqlangan.
Huquqbuzarlik holatlari bo‘yicha xabar bergan fuqarolarga 24 762 ta holat bo‘yicha (undirilgan jarima summasidan 20 foiz) 17,7 milliard so‘m mukofot to‘langan. Eng ko‘p mukofot puli Toshkent shahrida kelib tushgan murojaatchilarga berilgan — 4 milliard 279 million 500 ming so‘m. Eng kami esa murojaatlar soni ham kam bo‘lgan Jizzax viloyati aholisiga to‘langan — 512 million so‘m.
O‘zbekistonda soliq huquqbuzarliklaridan tashqari, suv xo‘jaligi sohasidagi huquqbuzarliklar to‘g‘risidagi foto va video yuborganlar, yerning o‘zboshimchalik bilan egallab olinishi haqida xabar bergan, daraxtlarni noqonuniy kesish holatlarini foto va videotasvirga olib jo‘natgan fuqarolar rag‘batlantiriladi. Shuningdek, elektr va gazdan foydalanish qoidabuzarliklari haqida, yer qa’ridan foydalanish qoidabuzarliklari haqida xabar berganlar rag‘batlantiriladi.
Izoh (0)