Xorvatiya terma jamoasi yarim himoyachisi Luka Modrich Jahon chempionati saralash bosqichi Yevropa o‘yinlarida o‘ziga xos natija qayd etdi. U mazkur musobaqa tarixida gol urgan eng yoshi katta futbolchiga aylandi.
Chexiyaga qarshi o‘yinning 62-daqiqasida Modrich penaltidan aniq zarba yo‘llab, raqib darvozasini ishg‘ol qildi. Luka bu golni 39 yosh 9 oylik bo‘lganda kiritdi.
Qiziq tomoni shundaki, avvalgi rekord atigi bir necha kun oldin yangilangan edi. 7-iyun, shanba kuni bosniyalik hujumchi Edin Jeko San-Marino darvozasiga gol urib, shu natijani o‘rnatgan edi. O‘shanda Jeko 39 yosh, 2 oy va 12 kunlik bo‘lgan. Bu o‘yin Jekoning terma jamoadagi xayrlashuv bahsi sifatida o‘tkazilgandi.
Ma’lumot uchun, Xorvatiya Chexiyaga qarshi bahsni 5:1 hisobida o‘z foydasiga hal qildi. Ayni paytda chexlar guruhda 9 ochko bilan yetakchilik qilayotgan bo‘lsa, ulardan ikki o‘yin kam o‘tkazgan Xorvatiya 6 ochko bilan 2-o‘rinda bormoqda.
Izoh (0)