Amazon asoschisi Jeff Bezos mashhur Vogue jurnalini rafiqasi Loren Sanchesga sovg‘a qilish uchun Condé Nast nashriyotini sotib olishi mumkin. Daily Mail nashrining yozishicha, Bezos nashr mutasaddilari bilan allaqachon muzokaralar o‘tkazgan.
Bezos va Sanchez turmush qurishi bilanoq, ularning kelinlik libosidagi surati Vogue jurnalining onlayn muqovasida paydo bo‘ldi. Bu muqova bosh muharrir Anna Vintur 37 yildan keyin lavozimini tark etishini e’lon qilganidan ko‘p o‘tmay chiqqan. Shundan so‘ng, Bezos Vogue’ni sotib olishi haqidagi mish-mishlar yanada kuchaygan.
Condé Nast 1959-yildan beri Nyuhauslar oilasiga va ularning Advance Publications kompaniyasiga tegishli xususiy nashriyot hisoblanadi. Kompaniya doim o‘zining mashhur nashrlar ro‘yxati sotilmasligini ta’kidlab kelardi. Shunga qaramay, so‘nggi voqealar ijtimoiy tarmoqlarda shubha va savollarni uyg‘otmoqda. Dunyodagi bir qancha bo‘limlarda xodimlar soni qisqartirilgani, Londondagi Vogue ofisi yopilib, o‘rniga e’tiborga loyiq bo‘lmagan bino tashkil etilgani ko‘pchilikni kompaniya strategiyasi borasida ikkilanishga majbur qilmoqda.
The Hollywood Reporter xabariga ko‘ra, Vogue, The New Yorker va Vanity Fair kabi nashrlarni o‘z ichiga olgan Condé Nast kompaniyasining qiymati taxminan 5 milliard dollarga baholangan. Agar mish-mishlar asosli bo‘lsa, Bezos bu media imperiyani qo‘lga kiritish uchun katta miqdorda pul sarflashiga to‘g‘ri keladi.
Eslatib o‘tamiz, 61 yoshli tadbirkor Bezos va 55 yoshli sobiq jurnalist Sanches 2023-yil may oyida unashtirildi. Bu ularning avvalgi munosabatlari yakunlangandan to‘rt yil o‘tib sodir bo‘ldi: Bezos o‘sha vaqtda sobiq rafiqasi Makkensi Skott bilan 25 yillik nikohiga yakun yasagan edi. Xuddi shu yili Sanches ham sobiq turmush o‘rtog‘i Patrik Vaytsel bilan ajrashdi. Oradan ikki yil o‘tib, ular to‘yga taklifnomalar tarqatdi. Ularning dabdabali to‘y marosimi joriy yil 26–28-iyun kunlari Venetsiyada o‘tkazildi va o‘sha haftada eng ko‘p muhokama qilingan voqealardan biriga aylandi. Turli OAV to‘y dasturining tafsilotlari, taniqli mehmonlar va marosimni bekor qilishga uringan mahalliy aholining norozilik namoyishlarini keng yoritdi.
Izoh (0)