Prezidentning “Nogironligi bo‘lgan shaxslarni sportga jalb etish orqali jismoniy reabilitatsiya qilish tizimini takomillashtirish bo‘yicha qo‘shimcha chora-tadbirlar to‘g‘risida”gi qarori qabul qilindi. Bu haqda Norma xabar berdi.

Maʼlum qilinishicha, 2024-yil 15-dekabrdan boshlab sport bilan shug‘ullanishni istagan nogironligi bo‘lgan shaxslarning murojaatiga ko‘ra, “Inson” ijtimoiy xizmatlar markazlari tomonidan davlat mulkida bo‘lgan jismoniy tarbiya-sog‘lomlashtirish va sport inshootlarida bepul sport bilan shug‘ullanish uchun yo‘llanma beriladi.

Alohida taʼlim ehtiyojlari bo‘lgan bolalar uchun ixtisoslashtirilgan taʼlim muassasalari va “Muruvvat” internat uylarida 2025—2026-yillarda Ijtimoiy himoya davlat jamg‘armasi mablag‘lari hisobidan sport inshootlarini qurish, taʼmirlash va jihozlash, shuningdek, sport to‘garaklarini tashkil etish rejalashtirilgan.

Hujjatga muvofiq quyidagilar tashkil etiladi:

• O‘zbekiston adaptiv sport turlari assotsiatsiyasining hududiy bo‘limlari;
• O‘zbekiston Milliy paralimpiya qo‘mitasi huzuridagi Paralimpiya sport turlari bo‘yicha mutaxassislarni tayyorlash instituti negizida adaptiv jismoniy tarbiya va adaptiv sport mutaxassislarini qayta tayyorlash va malakasini oshirish instituti.

Adaptiv sport turlari assotsiatsiyasining asosiy vazifalari etib adaptiv sport turlarini ommalashtirish va rivojlantirish belgilandi. Shuningdek:

• adaptiv sport turlari bo‘yicha NNTlar va davlat organlari o‘rtasidagi hamkorlikni taʼminlash;
• adaptiv sport turlari bo‘yicha iqtidorli sportchilarni aniqlash, saralash, tanlab olish va ularni professional sportchi sifatida tayyorlash tizimini muvofiqlashtirish;
• davlat sport-taʼlim muassasalari sport infratuzilmasi obyektlarining moddiy-texnik bazasini yaratishda ishtirok etish va konsepsiyalar hamda boshqa loyiha hujjatlarini ishlab chiqish;
• adaptiv sport turlari bo‘yicha murabbiylar, uslubchi-yo‘riqchilar va boshqa mutaxassislarni qayta tayyorlash, malakasini oshirish va kasbiy rivojlantirishning zamonaviy va samarali tizimini joriy etish va boshqalar.

2025-yil 1-fevraldan boshlab paralimpiya sport turlari, karlar sporti, ko‘rish qobiliyati buzilgan shaxslar sporti, maxsus olimpiada sport turlari, shuningdek, nogironligi bo‘lgan shaxslar shug‘ullanadigan boshqa sport turlari bo‘yicha mutaxassislarni qayta tayyorlash va malaka oshirish kurslari yo‘lga qo‘yiladi. Kurslar yakunida 4 yil davomida amal qiladigan malaka sertifikati beriladi.

Nogironligi bo‘lgan shaxslar YIDXP mobil ilovasi orqali jismoniy tarbiya-sog‘lomlashtirish va sport inshootlarini, shuningdek, adaptiv sport turlari bo‘yicha guruhlar tashkil etilgan sport maktablarini tanlash imkoniyatiga ega bo‘ladi.

Prezident — adaptiv sport turlari haqida

Shavkat Mirziyoyev Parijdagi Paralimpiya o‘yinlarida O‘zbekiston sharafini himoya qilgan sportchilar, ularning ota-onalari va murabbiylari bilan o‘tkazgan uchrashuvida mamlakatda imkoniyati cheklangan shaxslarni qo‘llab-quvvatlash, ularga inklyuziv sharoit yaratish bo‘yicha ulkan ishlar amalga oshirilayotganini aytgandi.

O‘tgan yildan boshlab Ijtimoiy himoya milliy agentligi faoliyat boshlagani qayd etilgan edi. Adaptiv sportni rivojlantirish hamda nogironligi bo‘lgan shaxslarni sportning ushbu yo‘nalishiga jalb etish maqsadida Adaptiv sport turlari assotsiatsiyasi tashkil qilindi.