Jahon Shaxmat Federatsiyasi iyun oyi yakunlangach, o‘z reytingini yangiladi. Yangilangan reytingda kuchli 100 talik ro‘yxatga 5 nafar o‘zbekistonlik grossmeyster kirishni uddaladi.
Norvegiyalik Magnus Karlsen hali ham FIDE reytingida yetakchilik qilmoqda. Hozirda uning hisobida 2839 ochko mavjud. Ikkinchi pog‘onani amerikalik Hikaru Nakamura (2807) egallagan bo‘lsa, kuchli uchlikka yana bir AQSh vakili Fabiano Karuana (2784) yakun yasagan.
O‘zbekistonlik grossmeyster Nodirbek Abdusattorov bir pog‘ona pastladi. U oxirgi bir necha oy davomida 6-o‘rinda edi, ammo iyun yakunlariga ko‘ra 7-pog‘onaga tushdi. Hozirda uning hisobida 2771 ochko bor. Hindistonlik Praggnanandhaa Rameshbabu Toshkentda o‘tgan UzChess Cup musobaqasida g‘alaba qozonib, o‘z reytingiga 11,3 ochko qo‘shdi. Natijada u FIDE reytingida 3 pog‘ona yuqorilab, 4-o‘ringa ko‘tarildi. Shu sababli Abdusattorov bir pog‘ona pastladi.
Toshkentda o‘tgan UzChess Cup musobaqasining Masters guruhida ikkinchi o‘rinni egallagan Javohir Sindorov yangilangan reytingda 25-o‘ringa ko‘tarildi. U o‘tgan oyga nisbatan 4 pog‘ona yuqoriladi va hozirda uning hisobida 2722 ochko mavjud.
Eng kuchli shaxmatchilar qatorida Rustam Qosimjonov ham bor. U 2675 ochko bilan 48-pog‘onani egalladi. Qosimjonovning reyting ballari o‘tgan oyga nisbatan o‘zgarishsiz qolgan, biroq u 1 pog‘ona pastladi. Shuningdek, Nodirbek Yakubboyev 59-pog‘onadan (2663 ochko), Shamsiddin Vohidov esa 76-o‘rindan (2650 ochko) joy oldi. Yakubboyev o‘tgan oyga nisbatan 6 pog‘ona yuqorilagan bo‘lsa, Vohidov 5 pog‘onaga ko‘tarildi.
Yoshlar reytingida esa Javohir Sindorov 2722 ochko bilan kuchli uchlikda qoldi.
Izoh (0)