Fransiya xalqaro sayyohlik yo‘nalishlari reytingida an’anaviy ravishda birinchi o‘rinni egalladi. Sun Travel nashrining hisobotiga ko‘ra, 2025-yilda mamlakatga 102 milliondan ortiq xorijiy sayyoh tashrif buyurgan. Bu ko‘rsatkich o‘tgan yilga nisbatan ikki millionga ko‘pdir. Turizm sohasidan tushgan yillik daromad esa 77,5 milliard yevroni tashkil etdi.


Parij va Kann kabi yirik shaharlar hamon ommabopligicha qolayotgan bo‘lsa-da, bugungi kunda sayyohlar orasida “ommaviy turizm”dan uzoqroq bo‘lgan, osoyishta hududlarga bo‘lgan talab ortib bormoqda.
Fransiya bo‘ylab hordiq chiqarish uchun tavsiya etiladigan 7 ta joy
Mutaxassislar 2026-yilda fransuz jozibasidan shovqin-suronsiz va hamyonbop narxlarda bahramand bo‘lish uchun quyidagi yo‘nalishlarni tanlashni maslahat beradi:
• Sent Maksim (Sainte-Maxime): Sen Trope yaqinidagi ushbu qirg‘oq bo‘yi shaharchasi o‘zining ajoyib muhiti va nisbatan arzon narxlari bilan ajralib turadi.
Foto: Wikipedia
• La Roshel (La Rochelle): Biskay ko‘rfazi sohilida joylashgan bo‘lib, yangi dengiz mahsulotlari va o‘ziga xos oshxonasi bilan sayyohlarni jalb qiladi.
• Domaine kempingi (Bormes-les-Mimosas): La Favier plyaji yaqinidagi hashamatli dam olish maskani. U mimoza gullari va o‘rta asrlarga xos me’moriy obidalar bilan mashhur.
• Morzin (Morzine): Alp tog‘lari bag‘ridagi ushbu shaharcha qishki mavsumda chang‘i sporti, yozda esa velosport va suv sayohatlari uchun qulay imkoniyatlarga ega.
Foto: Alpine Fleet
• Shantiyi (Chantilly): o‘zining tarixiy qal’asi va an’anaviy ko‘pirtirilgan qaymoqlari (shantiyi kremi) bilan mashhur bo‘lgan osoyishta shahar.
• Kemper (Quimper, Bretan): gotika uslubidagi arxitekturasi va o‘rta asrlarga xos eski shahar qismi bilan mashhur.
• Lill (Lille): mamlakat shimolidagi yirik markaz bo‘lib, o‘zining noyob me’moriy yodgorliklari va qulay infratuzilmasi sababli “kichik Parij” nomini olgan.
Foto: Expedia
Yuqorida sanab o‘tilgan joylar sayyohlarga haqiqiy fransuz muhitini his qilish bilan birga, ortiqcha xarajatlardan qochish imkonini beradi.