Rossiya bosh vaziri Mixail Mishustin Rossiya va Germaniya o‘rtasidagi harbiy-texnik hamkorlik to‘g‘risidagi bitimni bekor qilish haqidagi farmoyishni imzoladi. Tegishli hujjat 18 iyul, juma kuni huquqiy axborot rasmiy portalida e’lon qilingan.
“Rossiya Federatsiyasining xalqaro shartnomalari to‘g‘risida”gi Federal qonunning 37-moddasiga muvofiq, Rossiya Federatsiyasi hukumati bilan Germaniya Federativ Respublikasi hukumati o‘rtasida 1996-yil 14-iyunda Moskva shahrida imzolangan harbiy-texnik hamkorlik to‘g‘risidagi bitimning amal qilishini to‘xtatish haqida”, deyiladi hujjatda.
Hujjat bilan Rossiya Tashqi ishlar vazirligiga ushbu qaror haqida Germaniya Federativ Respublikasini xabardor etish vazifasi yuklangan.
Rossiya Tashqi ishlar vazirligi iyun oyida kelishuvdan chiqish niyatini bildirgan edi. Vazirlik bu kelishuv “Germaniya Federativ Respublikasi hukumatining ochiqdan-ochiq dushmanona siyosati” tufayli “mazmun va amaliy ahamiyatini yo‘qotgani”ni ta’kidlagan. Shuningdek, Germaniya hukumatini “Germaniya aholisiga Rossiyaga qarshi ruhda mafkuraviy ta’sir o‘tkazish” va “harbiy-siyosiy vaziyatni keskinlashtirishga ochiqdan-ochiq undash”da aybladi.
Rossiya va Germaniya Federativ Respublikasi hukumatlari tomonidan 1996-yil 14-iyunda imzolangan harbiy-texnik hamkorlik to‘g‘risidagi bitim ikki davlat korxonalari, tashkilotlari va muassasalari o‘rtasidagi hamkorlikni nazarda tutgan edi.
Rossiyaning Ukrainaga keng ko‘lamli bosqini boshlanganidan so‘ng, Germaniya va Rossiya o‘rtasidagi munosabatlar sovuq urush davridan buyon eng past darajaga tushdi. Berlin Kiyevni Rossiya tajovuziga qarshi kurashida faol qo‘llab-quvvatlamoqda. Germaniya hukumatining rasmiy ma’lumotlariga ko‘ra, Germaniya Rossiya bosqini boshlanganidan beri Ukrainaga yordam uchun 40 milliard yevrodan ortiq mablag‘ ajratgan.
Izoh (0)