Bugun, 19-iyul kuni Uzbekistan Airways'ning Istanbul — Toshkent yo‘nalishi bo‘yicha parvoz vaqtida chaqaloq tug‘ildi. Bu haqda aviakompaniya axborot xizmati xabar berdi.
Maʼlum qilinishicha, parvoz davomida yo‘lovchilardan birida muddatidan oldin tug‘uruq boshlangan. Bortdagi ikki nafar shifokor ekipaj bilan hamkorlikda zarur tibbiy yordamni tezkorlik bilan ko‘rsatgan.
“Ekipaj komandiri qarori bilan samolyot Urganch aeroportiga favqulodda qo‘ndi. U yerda ona va yangi tug‘ilgan o‘g‘il bolani shifokorlar kutib olishdi. Oila tezkor tarzda mahalliy klinikaga yetkazildi”, deyiladi manbada.
Kompaniya chaqaloqqa bulutlar orasida boshlangan hayot yo‘li parvozdek yengil va yorug‘ bo‘lishini tilagan.
Parvoz chog‘ida ro‘y beradigan tug‘uruq g‘ayrioddiy va kam uchraydigan hodisalardan biridir. Ba’zi davlatlar “osmonda tug‘ilgan” bolaga fuqarolik taklif qiladi. Aviakompaniyalar esa turli imtiyozlar, sovg'alar beradi.
Masalan, har yili minglab chet elliklar AQSH konstitutsiyasining 14-moddasidan foydalangan holda Amerika orzusida homilador holda samolyotga chiqadi. Qonunga ko‘ra, Amerika hududida (suv yoki havo) har qanday bola avtomatik ravishda AQSH fuqaroligini oladi. Amerikaliklarning aksariyati bu qonunni tanqid qilsa-da, u shu paytgacha ishlab kelmoqda. Shu bilan birga, Kanada, Argentina, Meksika kabi davlatlarda ham bu qonun amal qilib, farzandning ota-onasi kim bo‘lishidan qat’i nazar, farzandga o‘z fuqaroligini beradi.
Qolaversa, dunyoda ko‘plab aviakompaniyalar bortda dunyoga kelgan chaqaloqlarga qator sovg‘alar, ayniqsa o‘z samolyotlarida ma’lum masofaga uchish yoki bir umrlik bepul parvoz qilish huquqini beradi.
Joriy yil yanvar oyida ham Uzbekistan Airways samolyoti parvozi vaqtida bortda chaqaloq dunyoga kelgandi. Havo kemasi Toshkentdan Nyu York tomon uchayotgan bo‘lgan. Ammo aviakompaniya ona va bolaga sog‘liq tilash, shuningdek, ekipaj a’zolari va tibbiyot xodimlariga minnatdorlik bildirish bilan kifoyalangan. Xalqaro tajribadan kelib chiqqan holda, chaqaloqlarga aviakompaniya xizmatlaridan foydalanish huquqini beruvchi “oltin chipta” taqdim etilgani xususida mutlaqo gap-so‘z aytilmagan.
Izoh (0)