Kataloniyaning “Barselona” klubi 2024/25-yilgi mavsumda Ispaniya chempioni bo‘ldi. “Ko‘k-anorranglilar” La Liga 36-turda “Espanyol”ni 2:0 hisobida mag‘lub etib, muddatidan avval chempionlik unvoniga ega chiqdi.
Qo‘lga kirtilgan g‘alabadan keyin “Barselona” hisobidagi ochkolar soni 85 taga yetdi. Mavsum yakuniga ikki tur qolganida, jamoa eng yaqin ta’qibchisi — Madridning “Real” klubini 7 ochkoga ortda qoldirmoqda.
Mazkur titul klub tarixidagi 28-chempionlik bo‘lib, bu borada ular hali ham “Real Madrid”dan (36 marta chempion) ortda bormoqda. Shunindek, “Barselona” o‘z tarixda to‘qqizinchi marta ham chempionat, ham kubokni bir mavsum ichida qo‘lga kiritishga muvaffaq bo‘ldi.
Eslatib o‘tamiz, mavsum avvalida “Barselona” bosh murabbiylik lavozimiga nemis mutaxassisi Hansi-Diter Flikni tayinlagan edi. Uning boshchiligida kataloniyaliklar nafaqat La Liga hamda Ispaniya Kubogini, balki Superkubokni ham qo‘lga kiritishga erishdi.
Izoh (0)