Toshkent shahrining Sergeli tumani “Xontepa” mahallasidagi ichki ko‘chalardan biri loyli, aholi harakatlanishi uchun noqulay ekani xabar berilgan edi. Hokimlik axborot xizmati holat nazoratga olinganini maʼlum qildi.
Ijtimoiy tarmoqlar orqali Sergeli tumani “Xontepa” mahallasi, Taraqqiyot ko‘chasidagi yo‘lni asfalt qilish bo‘yicha murojaat qoldirilgan. Bu mahalla avval Toshkent viloyati Zangiota tumaniga qarashli bo‘lib, keyinchalik Sergeli tumaniga o‘tgan. Ushbu mahalladagi Taraqqiyot ko‘chasi 2021-yilda Vazirlar Mahkamasining 702-sonli qaroriga muvofiq bosqichma-bosqich asfaltlashtirish dasturiga kiritilgan. Bundan tashqari, 2024-yilda ushbu ko‘chada D-150 diametrli uzunligi 3000 p/m ichimlik suvi tarmog‘i o‘tkazilganligi sababli yo‘lni taʼmirlash ishlari to‘liq yakunlanmagan. Shu bois, mazkur mavsumda “Xontepa” mahallasida asfaltlash ishlari yuqoridagi qarorga muvofiq amalga oshirilishi rejalashtirilgan bo‘lib, Sergeli tuman hokimligi mazkur jarayonni nazoratga olganini maʼlum qilamiz, deyiladi hokimlikning bu haqdagi munosabatida.
Avvalroq “Daryo”da tumanning “Jo‘nariq” mahallasida joylashgan ko‘p qavatli uylarda yashovchi 1500 dan ortiq xonadon vakillari ishga borib-kelish, shuningdek, shahar markaziga chiqishda yo‘lsizlikdan qiynalayotgani haqida xabar berilgandi. Sergeli tumani hokimligi ushbu holatga eʼtibor qaratib, aholining erkin harakatlanishi uchun muammo tug‘dirayotgan loyli yo‘lni asfaltlashtirdi.
Izoh (0)