“Zolushka uchun uch yong‘oq” filmidagi Zolushka va Shahzodaning suratga olish maydonchasidagi sevgisi qanday yakunlangan?

“Zolushka uchun uch yong‘oq” kinoertagi premyerasi bo‘lib o‘tgandan so‘ng, turli mamlakatlarning millionlab yigitlari chex aktrisasi Libushe Shafrankova ijrosidagi nafis va jozibador Zolushkaga oshiq bo‘lib qolishdi. Qizlar esa o‘z navbatida shahzoda — Pavel Travnichekaning iste’dodiga maftun bo‘lishdi.

Ko‘zni qamashtiradigan juftlik

“Uch yong‘oq” filmini suratga olishni boshlagan rejissyor Zolushka roliga 19 yoshli Libushe Shafrankovani tasdiqlaydi. Unga yosh aktrisaning nafaqat chiroyi, balki yetarlicha kuchli xarakterga ega ekanligi yoqadi: bunday Zolushka o‘zini kamsitishga yo‘l qo‘ymaydi va yovuz o‘gay onaning tazyiqlariga munosib javob bera oladi.

Endi asosiy qahramonga munosib shahzodani topish kerak edi. Rejissyor Vatslav Vorlichek nomzodlarni qayta-qayta rad etaveradi, boisi hech biri to‘g‘ri kelmasdi. Unga “ikkinchi Alen Delon” kerak edi, u shunchalik kelishgan bo‘lsinki, bosh qahramonlar juftligi kadrda nafaqat yaxshi, balki ko‘zni qamashtiruvchi darajada ko‘rinsin. Nihoyat, Vorlichek Teatr akademiyasining 23 yoshli bitiruvchisi Pavel Travnichekani ko‘rib qoladi. Yigitning Moraviya viloyatiga xos shevasi bo‘lib, u otda yurishni ham bilmasdi. Eng muhimi, Pavel haqiqatan ham ertaklardagi shahzodaga o‘xshardi.

Ko‘p o‘tmay, tomoshabinlar teleekranlar qarshisida hayajondan qotib qolishdi. Ular so‘zamon, bir zumda o‘gay onasi, singlisi va hatto Shahzodaning o‘zini ham joyiga qo‘ya oladigan jasur va dovyurak Zolushkaga maftun bo‘lishdi. Libushe Shafrankova qishki qor bosgan dalalarda otda dadil chopib, og‘ir arbaletdan o‘q uzadigan, hazil-mutoyibaga usta, o‘zini himoya qila oladigan Zolushka rolini mahorat bilan ijro etdi. Bu safargi Zolushka o‘ziga ishongan, hozirjavob va kuchli qiz edi.

Sovuq o‘rmondagi jo‘shqin muhabbat

Ertakni e’tibor bilan kuzatsangiz, asosiy qahramonlar shunchaki rol o‘ynamayotganini, balki kadrda yashayotganini sezish mumkin. Ular bir-birlariga juda samimiy nigoh tashlashardi, bu yerda faqat aktyorlik mahoratining o‘zi yetarli emasdi. Libushe ham, Pavel ham tez-tez shu mavzuda savollarga duch kelishardi. Hammani qiziqtirgan narsa: ular o‘rtasida ishqiy munosabat bo‘lganmidi? Biroq artistlar jurnalistlarning qat’iy savollariga javob bermay, faqat sirli tabassum bilan cheklanishardi.

Bu sir ochilmay qolishi ham mumkin edi. Biroq ko‘p yillar o‘tib, tomoshabinlarning qiziqishi biroz so‘ngach, Travnicheka nihoyat suratga olish jarayonida bir-birlariga ko‘ngil qo‘yganlarini tan oladi. Ular ishdagi tanaffusni sabrsizlik bilan kutishardi: sevishganlar barcha tanaffuslarni qishki o‘rmonda birgalikda sayr qilib o‘tkazishgan.

“Havo juda sovuq edi. Men -20 daraja sovuqda yupun kiyimda edim, lekin Libushe bilan bir-birimizni isitib turardik”, deb eslaydi aktyor suhbat chog‘ida.

Ammo suratga olish ishlari tugashi bilan hissiyotlar ham so‘nadi. Aftidan, munosabatlar unchalik kuchli va jiddiy bo‘lmagan. Keyinchalik Shafrankova va Travnicheka yana bir bor “Uchinchi shahzoda” ertagida sevishganlar rolini o‘ynashadi. Ammo bu vaqtga kelib go‘zal Libushe allaqachon turmushga chiqqandi.

Shahzodaning to‘rt xotini

Travnichekaning o‘zi ham ko‘p o‘tmay uylanadi. Biroq qisqa vaqtdan keyin ajrashadi. San’atkorning keyingi ikki nikohi ham ajralish bilan yakunlanadi. O‘zining soda fe’l-atvori tufayli Pavel uchala sobiq turmush o‘rtog‘i bilan ham yaxshi munosabatlarni saqlab qoladi, OAV ma’lumotlariga ko‘ra, uning to‘ng‘ich o‘g‘li haqida bunday deb bo‘lmaydi. Uni otasi bilan gaplshishni istamaydi. Pavel Travnicheka ham bu mavzuda hech qanday izoh bermagan — o‘g‘li haqidagi savollar unga yoqmaydi.

To‘rtinchi xotini bilan esa baxtli hayot kechirmoqda. Monika Fialkova 20 yildan beri uning yonida, 2017-yilda ular o‘g‘illi bo‘lib, unga Maksimilian deb ism qo‘yishadi. Hozirda “Zolushka uchun uchta yong‘oq” ertagidagi mashhur Shahzoda 74 yoshda, Monika esa undan 34 yosh kichik. Pavel teatrda faoliyatini davom ettirmoqda.

Zolushkaning yagona muhabbati

Go‘zal Zolushka masalasiga kelsak, Libushe Shafrankova filmdagi ishini tugatgandan so‘ng ko‘p o‘tmay, u uchun sevimli va yagona - bir umrlik haqiqiy shahzodasini uchratadi. Uning ismi Yozef Abragam bo‘lib, Shafrankova ishlagan teatr aktyori edi. Yozef undan 13 yosh katta ammo shunga qaramay ularning munosabati yaxshi edi.

Bir muddat o‘tgach, ular turmush qurib, o‘g‘il farzand ko‘rishadi. Libushe uni sevimli eri sharafiga Yozef deb ataydi. U kinoda rol ijro etishni davom ettiradi, ertak-filmlarida bir necha bor malika rollarini o‘ynaydi, biroq filmografiyasida jiddiy dramatik rollar ham bor. Aktrisa jamoat oldida ko‘p ko‘rinmaydi — u eri bilan dabdabali tadbirlarni yoqtirmas, bo‘sh vaqtlarini oila davrasida o‘tkazishni afzal ko‘radi. Muxlislar uchun Libushe Shafrankova va Yozef Abrgam oilaviy baxt timsoli edi: ular bir-biridan hatto ikki kunga ham ajrala olmas, agar ketish kerak bo‘lsa, rolini rad etar va imkon qadar doim birga bo‘lishga harakat qilishardi. Go‘yo taqdir ularga hamisha ham mehribon bo‘lavermasligini oldindan sezganday edilar.

Qayg‘uli yakun

Libushe va Yozef 45 yil birga yashadi. Keyin esa birin-ketin qayg‘uli kunlar boshlanadi. Avvaliga eri yurak kasalligiga chalinadi. Keyin aktrisaning o‘ziga o‘pka saratoni tashxisi qo‘yiladi. Eri har doim yonida bo‘lgan, xotinidan ajralmagan, hamma narsada yordam bergan va qo‘llab-quvvatlagan. Ular muammolarni keng jamoatchilikka oshkor qilishmasdi — o‘zlari hal qilishardi va faqat eng yaqinlarigina Libushe nima uchun omma oldida ko‘rinmay qolganini bilishardi.

2021-yil yozida bolaligimizning go‘zal Zolushkasi, chexiyalik aktrisa Libushe Shafrankova vafot etdi. U 68 yoshga to‘lganidan ikki kun o‘tib, olamdan o‘tdi. Uning muxlislari esa sevimli aktrisalarini ko‘rgisi kelganda “Zolushka uchun uchta yong‘oq”, “Uchinchi shahzoda” va uning ishtirokidagi boshqa filmlarni qayta tomosha qilishadi — ekranda Libushe yana jonlanadi, tabassum qiladi, shahzoda bilan hazillashadi, balda raqsga tushadi va qorli o‘rmonda ot minadi.