Shveysariyalik tadqiqotchilar omega-3 ni har kuni iste’mol qilish tanadagi tabiiy qarish jarayonini sekinlashtirishini isbotladi. Ilmiy tadqiqotda 70 va undan katta yoshdagi 777 nafar inson ishtirok etdi. Olimlar tomonidan berilgan natijalar Nature Aging jurnalida chop etildi.
Uch yil davomida har kuni bir gramm omega-3 iste’mol qilgan sog‘lom keksalarning biologik yoshi boshqa ishtirokchilarga qaraganda uch oyga yoshroq bo‘lishi aniqlandi. Bundan tashqari, ratsionga D vitaminini qo‘shish va jismoniy mashqlar (haftada uch marta 30 daqiqadan) ushbu natijani to‘rt oyga oshirdi.
Olimlar omega-3 ning qarish tezligiga ta’sirini baholash uchun epigenetik soatlar deb nomlanuvchi biologik vositalardan foydalandi.
Epigenetik soat bu to‘qimalar, hujayralar va organlarning biologik yoshini aniqlashga imkon beruvchi maxsus DNK belgilari to‘plamidir.
“Fikrimcha, 70 yosh bu ikkinchi bor 50 yoshga to‘lishga o‘xshaydi. Albatta, bu usul qarishning davo bo‘l olmaydi, ammo tadqiqot natijalari ushbu usulning qanchalik samarali ekanligini tasdiqlaydi. Omega-3 va D vitaminining kichik dozalarini muntazam ravishda qabul qilish va jismonan faollik haqiqatda inson umrini uzaytiradi”, deydi Altos Labs biotexnologiya kompaniyasi tadqiqotchisi Stiv Horvat.
Bundan avvalgi tadqiqotlarda ham yog‘li baliq, yong‘oqlar, urug‘lar kabi oziq-ovqatlarda mavjud bo‘lgan omega-3 qarish jarayonini sekinlashtirishi aniqlangan edi. Biroq yaqin vaqtgacha uni qo‘shimcha vitamin shaklida qabul qilish orqali ham ijobiy natijalarga erishish mumkinligi noma’lum edi.
Shuningdek, olimlar omega-3 yog‘ kislotalarining boshqa foydali xususiyatlarini ham qayd etdi. Xususan, ushbu modda keksa odamlarda to‘satdan yiqilish holatlarini 10% ga kamaytiradi, infeksiyalarga chalinish xavfini esa 13% ga tushiradi. Bundan tashqari, omega-3, D vitamini va muntazam jismoniy mashqlar invaziv saraton kasalliklarini 61 foizga kamaytirdi.
Izoh (0)