Ideal vazn va qomatga intiladigan ayollar o‘z maqsadiga yetishish uchun ba’zan radikal metodga o‘tishga qaror qiladi va jiddiy parhez turlarini sinab ko‘radi. Biroq bir haftada 3 kilogramm yo‘qotish haqidagi tavsiyalarga amal qilish sog‘liq uchun jiddiy oqibatlarga olib kelishi mumkin.
1. Immunitetning pasayishi va holsizlik
Oqsillar tanamizning asosiy qurilish materialidir. Ular hujayralar o‘sishi va tiklanishi, fermentlar va gormonlarning ishlashi, mushak massasi va immunitetni me’yorda ushlash uchun javobgardir. Ratsiondan oqsillarni chiqarib tashlash temir tanqisligi, kamqonlik, zaif immunitet va turli shishlar paydo bo‘lishiga olib keladi.
Yoki aksincha, ortiqcha oqsil buyrakda tosh hosil bo‘lishiga, suyak to‘qimalarining zaiflashishiga sabab bo‘ladi. Demak, har qanday parhezda me’yor muhim.
2. Gormonlar va reproduktiv tizim bilan bog‘liq muammolar
Foydali yog‘lar bosh miya faoliyati, asab tizimi hamda barcha gormonlarni tartibga solish uchun zarurdir. Ular A, D, E va K vitaminlarini o‘zlashtirishga yordam beradi, metabolizmni va reproduktiv salomatlikni qo‘llab-quvvatlaydi. Ratsiondan foydali yog‘larni olib tashlash ayollarda hayz davri bilan bog‘liq muammolarni, vitaminlar yetishmasligini va asabiylikni keltirib chiqaradi.
3. Asab tizimining toliqishi
Uglevodlarni cheklash eng mashhur parhez amaliyotlaridan biri, ammo ayni paytda eng zararli ham hisoblanadi. Uglevodlar miya uchun asosiy energiya manbai hisoblanadi. Ularning yetishmasligi organizmda quvvatning yo‘qolishiga, xotiraning buzilishiga, diqqatning pasayishiga va hatto depressiv holatlarga olib keladi.
4. Qisqa muddatli natijalar — uzoq muddatli muammolar
Har qanday parhez kaloriya tanqisligi orqali ozishga olib keladi. Parhezni tugatgach, inson avvalgi ovqatlanish tartibiga qaytishi bilanoq, uning vazni ham yana eski holatga keladi. Tana vaznidagi bunday keskin o‘zgarishlarning doimiy davom etishi metabolizm, yurak va jigar faoliyatiga salbiy ta’sir ko'rsatadi.
5. Yurak-qon tomir kasalliklari xavfining ortishi
Keto parhezi kabi yuqori diyetalar to‘yingan yog‘lar iste’molining keskin ortishini anglatadi. Bu esa xolesterin darajasining oshishiga olib keladi. Natijada ateroskleroz va yurak-qon tomir kasalliklari rivojlanish xavfi ortadi.
Keto yoki ketogenik diyetasi — bu yuqori yog‘li, past uglevodli va o‘rtacha miqdorda oqsilli parhez turidir. Uning asosiy maqsadi, organizmni “ketoz” holatiga o‘tkazishdir. Ketoz — bu tananing uglevodlar o‘rniga yog‘lardan energiya manbai sifatida ishlatish holatidir.
6. Surunkali xastaliklarning kuchayishi
Ortiqcha vazndan xalos bo‘lishning eng mashhur, ammo o‘ta xavfli usullaridan biri bu sharbatli detoksdir. Bir haftada 5 kilogrammga ozishni va’da beradigan bunday sharbatlar albatta ko‘pchilikning e’tiborini tortadi va hatto natija ham ko‘rsatadi. Biroq bunday parhez gastrit, oshqozon yarasi, pankreatit va yurak-qon tomir kasalliklarining kuchayishiga olib keladi.
7. Suyak mo‘rtlashishi
Ratsiondagi yog‘lar va oqsillarni cheklash suyak salomatligiga jiddiy zarar yetkazadi, chunki oqsillar suyak to‘qimasining asosiy qismini tashkil qiladi. Ularning mustahkamligi uchun foydali yog‘lar hamda D va K kabi yog‘da eriydigan vitaminlarni javob beradi. Tana ushbu muhim elementlarni yetarli darajada qabul qilmaganda, u suyak to‘qimasidan kaltsiy va fosforni ola boshlaydi. Bu esa suyaklarning zaiflashishiga va hatto osteoporozga olib keladi.
8. Kuchli stress
Qat’iy cheklovlarga to‘la har qanday parhez stressga olib kelishi muqarrar. Parhez tutayotgan tana kaloriya va ozuqa moddalarining yetishmasligini organizm faoliyatiga tahdid sifatida qabul qiladi va bu haqda bosh miyaga signal berishni boshlaydi. Natijada odam tushkunlikka tushib qoladi.
9. Quruq teri, sinuvchan sochlar va tirnoqlar
Tana ovqat orqali yetarli vitamin va minerallarni olmaganida, bu tashqi ko‘rinishimizda aks etadi. Teri oqaradi va quruqlashadi, sochlar mo‘rt va sinuvchan bo‘lib qoladi, tirnoqlar holati ham yomonlashadi.
10. Ovqat hazm qilish tizimida buzilishlar
Keto parhezi va boshqa kam uglevodli diyetalar o‘simlik tolasiga boy mahsulotlarni cheklashga chaqiradi. Bunday usullar qabziyat, qorin dam bo‘lishi kabi turli noqulayliklarni tug‘diradi. O‘simlik tolasi ichaklar salomatligi uchun zarurdir va ularning tanqisligi ichak mikroflorasiga shikast yetkazadi.
Xulosa qilib aytganda, har qanday parhezga amal qilishda me’yorga amal qilish turli xil nojo‘ya ta’sirlarning oldini oladi. Masalan, Garvard olimlari kosadagi bir porsiya taomni quyidagicha taqsimlashni tavsiya qiladi: uning tarkibida 50% sabzavotlar, 25% oqsillar, 25% murakkab uglevodlar bo‘lishi lozim.
Izoh (0)