Isroil milliy xavfsizlik vaziri Itamar Ben-Gvir masjidlarda musulmonlarni namozga chaqirish uchun ovozkuchaytirgichlardan foydalanishni taqiqlashni buyurdi. Bu haqda The Times of Israel xabar berdi.
Chora go‘yoki ko‘chadagi shovqinga qarshi kurash doirasida joriy etilmoqda. Biroq ayrim rasmiylar bu “diniy nizo”ni kuchaytirishga qaratilganini ta’kidlagan. Endilikda politsiya masjidlarga kirib, ovozkuchaytirgichlar musodara qila oladi. Bunday ovoz moslamalaridan azon aytish uchun foydalangan masjidlar esa jarimaga tortilishi mumkin.
Isroilning aralash aholi yashaydigan shaharlaridagi mahalliy hokimiyat vakillari Ben-Gvirning bu buyrug‘ini “provokatsiya” deb baholagan. Ularning fikricha, mazkur qadam mojaro kuchayishiga, tartibsizliklarga olib kelishi mumkin. Ben-Gvir qarorini quyidagicha izohladi:
Shovqin ko‘pchilik G‘arb mamlakatlarida va hatto arab davlatlarida ham cheklanadi. Faqat Isroilda tartibsizlik hukm surmoqda. Shubhasiz, ibodat qilish fuqarolarning asosiy huquqlaridan biri, biroq u atrofdagilarning hayot sifatini yomonlashtirish evaziga amalga oshirilmasligi lozim, degan u.
Knesset (parlament) deputati Ahmad Tibi mazkur qarorga norozilik belgisi sifatida XADASH-TAAL va RAAM fraksiyalari nomidan hukumatga ishonchsizlik votumini parlament muhokamasiga kiritdi.
Ben-Gvir diniy urushni alangalatmoqchi. U politsiyaning masjidlarga bostirib kirishini qo‘zg‘atmoqda, degan Tibi.
“Likud” deputati Dudi Amsalem ham milliy xavfsizlik vazirining qaroriga qarshi chiqib, barcha diniy urf-odatlarni hurmat qilish kerakligini aytdi.
Itamar-Ben Gvirga sanksiya qo‘llanilishi mumkin
Yevropa Ittifoqi va AQSH Isroil milliy xavfsizlik vaziriga qarshi sanksiya qo‘llashni rejalashtirmoqda. Bunga yahudiy vaziri G‘azo sektori aholisiga insonparvarlik yordami yetkazib berishni to‘xtatishga chaqirgani sabab bo‘lgan. Ben-Gvir shu yo‘l bilan HAMASni taslim bo‘lishga undashni mo‘ljallagan.
Izoh (0)