O‘zbekiston Respublikasi Oliy Majlisi Senati a’zolarini saylash bo‘yicha Qoraqalpog‘iston Jo‘qorg‘i Kengesi, Toshkent shahri va viloyatlar hamda tuman (shahar) kengashlari deputatlarining qo‘shma majlislari 7−12-noyabr kunlari o‘tkaziladi. Bu haqda Markaziy saylov komissiyasining 2-noyabrdagi yig‘ilishida ma’lum qilindi.
Markaziy saylov komissiyasining navbatdagi majlisida Oliy Majlis Senati a’zolari saylovi bo‘yicha Qoraqalpog‘iston Respublikasi Jo‘qorg‘i Kengesining, xalq deputatlari viloyat, tuman, shahar kengashlarining tegishli qo‘shma majlislarini chaqirish, Oliy Majlis Senati a’zolari sayloviga doir ayrim hujjatlarni tasdiqlash masalalari muhokama qilingan.
Komissiyaning tegishli qaroriga binoan Oliy Majlis Senati a’zolari saylovi bo‘yicha Qoraqalpog‘iston Respublikasi Jo‘qorg‘i Kengesi, viloyatlar, Toshkent shahar, tumanlar va shaharlar mahalliy kengashlarining qo‘shma majlislari joriy yilning 7-12-noyabr kunlari o‘tkazilishi belgilangan.
Majlis davomida Oliy Majlis Senati a’zolari saylovini o‘tkazish bilan bog‘liq ayrim hujjatlar namunalari tasdiqlangan.
Qayd etish lozim,
Oliy Majlis Senati a’zolari Qoraqalpog‘iston Respublikasi Jo‘qorg‘i Kengesi, viloyatlar, tumanlar va shaharlar davlat hokimiyati vakillik organlarining tegishli qo‘shma majlisida mazkur deputatlar orasidan yashirin ovoz berish yo‘li bilan saylanadi.
Yangilangan Konstitutsiyaga ko‘ra, endilikda senatorlar soni 65 nafarni tashkil etadi. Ular Qoraqalpog‘iston, viloyatlar va Toshkent shahridan teng miqdorda — 4 nafardan (ilgari 6 nafardan) saylanadi. Senatning yana 9 nafar a’zosi (ilgari 16) fan, san’at, adabiyot, ishlab chiqarish hamda davlat va jamiyat faoliyatining boshqa sohalarida katta amaliy tajribaga ega bo‘lgan eng obro‘li fuqarolar orasidan prezident tomonidan tayinlanadi.
Izoh (0)