Turinning “Yuventus” jamoasining X (sobiq Twitter) dagi sahifasi hakerlar hujumiga uchradi.
“Yuventus”ning ingliz tilidagi akkauntiga hakerlar buzib kirgan va “Real” yarim himoyachisi Arda Gyulerning transferi haqidagi yolg‘on ma’lumotni chop etgan.
“‘Yuventus’ga xush kelibsan, Arda Gyuler! Kelajagi porloq futbolchi endi ‘Yuventus’ oilasining a’zosi hisoblanadi! Bu yangi sayohatda birgalikda tarix yaratishga tayyormisiz?”, — deb yozilgan edi postda.
“Byankoneri” o‘zining asosiy sahifasida vaziyat bo‘yicha bayonot berdi. “Ingliz tilidagi akkauntimiz hakerlar hujumiga uchradi. Iltimos, o‘sha akkauntda e’lon qilinayotgan yolg‘on ma’lumotlarga ishonmang. Muammoni bartaraf etish bo‘yicha ishlayapmiz”.
Qayd etib o‘tish joiz, “Yuventus” A Seriyada 16 ochko jamg‘argan holda 3-o‘rinda bormoqda.
Izoh (0)