Isroil mudofaa vaziri Yoav Gallant Livan bilan shimoliy chegaraga yangi kuchlar joylashtirilayotgani, u yerda “urushning yangi bosqichi” boshlanayotganini aytdi. Bu haqda The Times of Israel xabar berdi.
“Og‘irlik markazi shimolga ko‘chmoqda. Biz kuch, resurs va energiyani shimolga yo‘naltirmoqdamiz”, dedi Isroil mudofaa vaziri harbiylar bilan uchrashuvda.
Uning ta’kidlashicha, mamlakatning shimoldagi urushdagi maqsadlari “aniq va oddiy”: shimoliy shaharlar aholisining o‘z uylariga xavfsiz qaytishini ta’minlash. Galant hukumat HAMAS tomonidan garovga olinganlarni unutmasligi va murakkab vaziyatga qaramay janubdagi vazifalarni bajarishda davom etishini aytdi.
“Bu bizning burchimiz va biz uni bir vaqtning o‘zida bajarmoqdamiz”, deya qo‘shimcha qildi u.
Isroil bosh vaziri Binyamin Netanyaxu ham qisqa videomurojaat e’lon qilib, evakuatsiya qilingan shimol aholisi o‘z uylariga qaytarilishini aytdi.
Isroilning Livandagi “operatsiyasi”
17-sentyabr kuni Livanda “Hizbulloh” guruhi a’zolari foydalanayotgan peyjerlarning portlashlari qayd etildi, oqibatda 4000 dan ortiq kishi jarohatlandi, 12 kishi halok bo‘ldi. Tashkilot buning uchun javobgarlikni Isroilga yukladi, yahudiy davlati rasmiylari portlashlar haqidagi xabarlarga izoh bermayapti.
Manbalarga ko‘ra, Isroilning “Mossad” razvedka agentligi “Hizbulloh” uchun mo‘ljallangan peyjerlar portlatilishidan oldin ularni qo‘lga kiritib, batareyalariga PETN portlovchi moddalarini o‘rnatgan va ularni masofadan turib haroratini ko‘targan. Bu esa peyjerlarning portlashiga sabab bo‘lgan.
18-sentyabr kuni Livanda portlashlarning ikkinchi to‘lqini sodir bo‘lgan, bu boshqa aloqa qurilmalariga, xususan, portetiv radiopriyomniklarga ta’sir qilgan. Kamida 300 kishi yaralanib, to‘qqiz kishi halok bo‘lgan.
Izoh (0)