Joriy yil 18-sentyabr kuni aktyor va Kaliforniyaning sobiq gubernatori Arnold Shvarsenegger Berlindagi Hertie School xususiy universitetining faxriy doktori unvoniga sazovor bo‘ldi. Bu haqda “Zakon.kz” xabar berdi.
Tadbirdan lavhalar universitetning matbuot xizmati tomonidan e’lon qilindi. Terminatorning o‘zi ham Instagram sahifasida ushbu kundagi fotosuratlarni bo‘lishdi.
Aktyor ushbu darajaga iqlim o‘zgarishlariga qarshi kurashish va fuqarolik jamiyatini rivojlantirishga qo‘shgan hissasi uchun sazovor bo‘ldi. Marosimda aktyorni Germaniya vitse-kansleri Robert Habek tabrikladi. U kino yulduzining AQSHning Kaliforniya shtati gubernatori sifatidagi faoliyati davomida qayta tiklangan energiya manbalari bo‘yicha mehnatini e’tirof qildi.
Arnold Shvarsenegger 1947-yil 30-iyulda Avstriyaning Tal shahrida tug‘ilgan. Dastlab mohir bodibilder sifatida tanilgan aktyor “Terminator”, “Yirtqich” va “Qizil jazirama” kabi ajoyib jangari filmlardagi rollari tufayli xalqaro yulduzga aylangan. 1966-yilda u “Dunyoning eng kelishgan erkagi” tanlovida ikkinchi o‘rinni egallagan va 1967-yilda u mutlaq g‘olib bo‘lgan. 2003-yildan 2011-yilgacha u Kaliforniya gubernatori bo‘lib ishlagan. Juda kam oylik olganiga qaramay, Shvarseneggerning o‘zi “ushbu vaqtni hayotidagi eng yaxshi davri” deb hisoblaydi.
Izoh (0)