Mashhurlarning uy hayvonlari oilaning to‘liq a’zosi bo‘lib, u o‘z egasi bilan bir xil imtiyozlarga ega: tug‘ilgan kunlarni nishonlash, hashamatli salonlariga tashrif buyurish, shaxsiy “sartarosh”ga borish, yuqori sifatli taomlarni iste’mol qilish shular jumlasidan.
Opra Uinfri
Amerikalik teleboshlovchi itlarni yaxshi ko‘radi, uning Sedi, Sanni va Loren laqabli kuchuklari bor. Bungacha jurnalistda golden-retriver va spaniel zotlari ham bo‘lgan.
“Hayotdagi asosiy ustozlarimdan biri bu — itim Sofi. U 13 yil yashadi, har kuni men bilan ishga borardi. U barcha shoularda, “Oskar”, “Emmi” olganimda ham, homilamdan ayrilganimda ham meni mashinada kutib turgan. U vafot etganida hayotimda hech kim meni o‘sha itchalik yaxshi ko‘rmaganligini angladim”.
Aytgancha, 2008-yilda u Sofiga bag‘ishlangan shou yaratgan. Hozirda Uinfri uy hayvonlariga bor mehrini berib, g‘amxo‘rlik qiladi. Jurnalist ular uchun jamg‘arma tashkil qilgan — har bir itiga 30 million dollardan ajratgan.
Mayli Sayrus
“Xanna Montana” teleserialining yulduzi ham hayvonlarni yaxshi ko‘radi. Mayli itlar, mushuklar, dengiz cho‘chqachalariga g‘amxo‘rlik qiladi.
U tez-tez itlar bilan sayrga chiqadi, lekin mashina o‘rindiqlarini iflos qilgani sababli qo‘shiqchi ular uchun 160 ming dollarlik Range Rover sotib olgan — endi ular xohlagan ishlarini qilishlari mumkin. Shuningdek, yulduz uy hayvonlari uchun enaga yollagan, u gastroldaligida ularga qarab, jadvalga muvofiq ovqatlantiradi.
“Ajoyib uy hayvonlarim bor, ular bilan vaqt o‘tkazish menga yoqadi. Pianino chalganimda jonivorlarim boshlarini egib, meni diqqat bilan tinglashadi”.
Karl Lagerfeld
Lagerfeld nemis moda dizayneri bo‘lib, hech qachon uylanmagan, farzandi ham yo‘q. Shuning uchun u butun sevgisini Birma mushugi Shupett (fransuzchadan — karamcha)ga qaratgan.
Hayotining so‘nggi yillarida mushugi uning asosiy ilhom parisi bo‘lgan. Bundan tashqari, mushuk fotosessiyalarda ishtirok etib, egasiga 3 million yevrodan ortiq daromad keltirgan. Dizayner mushugi haqida “Shupett: parvoz qilayotgan moda mushugining shaxsiy hayoti” kitobini yozgan va u uchun ijtimoiy tarmoqda shaxsiy akkaunt ochgan.
Mushugi uchun Karl shaxsiy samolyot, u o‘ynashni yaxshi ko‘radigan planshet sotib olgan, u uchun maxsus texnik xodimlar yollagan. Dizaynerning o‘limidan so‘ng butun boyligini mushugi nomiga o‘tkazgani ma’lum bo‘ldi.
Ariana Grande
Amerikalik qo‘shiqchi va “Gremmi” mukofoti sovrindori bitta uy hayvoni bilan cheklanmaydi. Uning qaramog‘ida dengiz cho‘chqasi Piggi, Tuyaqush laqabli teryer, Sineman laqabli pitbul, Tuluza laqabli chihuahua va Pignoli, Ofeliya va Sirius laqabli labradudlar bor.
Ariana kelajakda yana bir nechta uy hayvonlari olishni rejalashtirmoqda. Itlarning har biriga shaxsiy yordamchi yollagan. Jonivorlar ko‘pincha u bilan birga — yirik aviakompaniyaning birinchi sinfidagi shaxsiy samolyotda uchishadi.
Aytgancha, Piggiga uchta yordamchi g‘amxo‘rlik qiladi. Ular har kuni dengiz cho‘chqachasining qornini massaj qiladi va tushdan keyin gazak qilish uchun uni noz-ne’matlar bilan erkalaydi.
Izoh (0)