Sirdaryo viloyatida “Eng faol talaba” mukofoti ta’sis etildi. Bu haqda viloyat hokimligi axborot xizmati xabar berdi.
Qayd etilishicha, viloyatdagi oliy ta’lim muassasalarida tahsil olayotgan iqtidorli, intiluvchan, jamoat ishlarida faol, o‘zining a’lo baholari va xulqi bilan tengdoshlariga namuna bo‘lib kelayotgan talabalarni moddiy qo‘llab-quvvatlash maqsadida “Eng faol talaba” mukofoti ta’sis etildi. Bu haqda Toshkent kimyo-texnologiya instituti Yangiyer filialida yangi o‘quv yili boshlanishi munosabati bilan o‘tkazilgan “Talabalikka bag‘ishlov” tadbirida ishtirok etgan viloyat hokimi ma’lum qildi.
Talabgorlarni tanlash va tavsiya etish ishlari jamoatchilik asosida faoliyat yuritadigan “ishchi guruhi” tomonidan amalga oshiriladi va yakuniy natijasi bo‘yicha viloyat hokimligiga takliflar kiritiladi. Mukofot puli bazaviy hisoblash miqdorining 10 barobarigacha miqdorida etib belgilangan.
Viloyat hokimi “Eng faol talaba” mukofoti talabalar o‘rtasida sog‘lom raqobat muhitini yaratishga xizmati qilishi bilan birga ularni yanada ko‘proq o‘qib-o‘rganishga undashini ta’kidladi.
Tadbir davomida bir guruh faol talabalarga sertifikatlar topshirildi. Viloyat hokimi talabalikka qabul qilingan yetti yuzdan ziyod yoshlarga “Mustaqillik darsi”ni o‘tdi.
Izoh (0)