EastFruit tahlilchilariga ko‘ra, 2023-yil yakuni bo‘yicha O‘zbekiston dunyoda uzum eksport qiluvchi eng yirik davlatlar qatoridan chiqib, 20-o‘ringa tushdi. Mamlakat uzumchilik eksporti bo‘yicha bir yilda 11 pag‘onaga pastladi. “Daryo” jurnalisti bilan suhbatda bo‘lgan parkentlik fermer Gavhar Rizayevaning aytishicha, reytingda pastlash 2023-yilda uzum hosilining yaxshi bo‘lmagani bilan bog‘liq.
Shaxsan o‘zimda Parkent tumanining Zarkent qishlog‘ida 25 gektarlik uzumzor bor. Uzumzorim lalmi yerda. Bu yil hosildorligimiz zo‘r. 2022-yildagi anomal sovuq 2023-yildagi uzum hosilimizning keskin tushib ketishiga sabab bo‘ldi. Natijada O‘zbekiston uzum eksportida sezilarli darajada pastladi, deydi zarkentlik Gavhar Rizayeva.
Suhbatdosh fermerning aytishicha, 2024-yildagi mavsumda 25 gektarlik uzumzoridan juda katta hosil olishi rejalashtirilgan.
2024-yildagi hosildorligimiz juda zo‘r. Nasib etsa uzum eksportini 110 foizga bajarishni reja qilyapmiz. Va o‘ylaymanki, men hamda men kabi uzum yetishtiruvchi, eksport qiluvchilarning mehnati sabab O‘zbekiston yana uzum eksporti bo‘yicha yuqori o‘rinlarga chiqadi, deydi Toshkent viloyatining Parkent tumanida faoliyat yurituvchi fermer ayol.
Gavhar opaning ma’lumot berishicha, u har yili 250 tonnagacha uzum eksport qiladi.
300 tonnalik muzlatgichimiz bor. Bunda sarxil mevalarimizni saqlab, 4-5 oydan so‘ng uzumlarimizni qo‘shni Qozog‘iston, Qirg‘iziston va Rossiyaning barcha o‘lkalariga sotamiz, deydi fermer.
Izoh (0)