Niderlandiya mudofaa vaziri Ruben Brekelmans mamlakat rasmiylari Ukrainaga berilgan qurollardan foydalanish doirasini cheklamaganini ma’lum qildi.
Uning aniqlik kiritishicha, Ukraina Qurolli kuchlari Niderlandiyadan olingan F-16 qiruvchi samolyotlari yordamida Rossiya hududidagi harbiy nishonlarga hujum qilishi va uning raketalarini urib tushirishi mumkin.
“Ukrainaga xalqaro huquq me’yorlariga ko‘ra o‘zini himoya qilish uchun Rossiya hududida qurollarimizdan foydalanishga ruxsat berilgan... Agar mamlakat chegara hududlari yoki Rossiya aerodromlaridan hujumga uchrasa, u harbiy nishonlarga hujum qilishi mumkin. Xuddi shu narsa dushman raketalariga ham taalluqlidir – ularni bizning qurollarimiz Rossiya uzra tutib olishi ham mumkin”, deya tushuntirdi vazir Frankfurter Allgemeine Zeitung nashriga bergan intervyusida.
Brekelmansning so‘zlariga ko‘ra, “xalqaro huquq masofa bilan cheklanmaydi” va “o‘zini himoya qilish huquqi chegaradan 100 km uzoqlikda tugamaydi”. U Ukraina Qurolli Kuchlari jangchilari qiruvchi samolyotlardan “xalqaro qonunlarga muvofiq” foydalanishiga ishonch bildirdi.
“Biz o‘z pozitsiyamizni tushuntirgan holda, boshqalarni ham Ukrainaga berilgan qurollardan foydalanish bo‘yicha cheklovlarni bekor qilishga chaqiramiz. Cheklovlarni butunlay olib tashlashni istamasalar, hech bo‘lmaganda Rossiya harbiy aerodromlari yoki qiruvchi samolyotlari uchun istisno qilishlari kerak”, deya qo‘shimcha qildi Ruben Brekelmans.
Iyul oxirida, Bloomberg ma‘lumotlariga ko‘ra, Ukraina birinchi F-16 qiruvchilarini oldi. The Times nashrining yozishicha, Niderlandiya oltita F-16 yetkazib bergan, Daniya esa yana bir nechtasini yetkazib berishi kerak edi.
Niderlandiya Mudofaa vazirining ma'lum qilishicha, F-16 dan foydalangan holda Rossiya Federatsiyasi hududida fuqarolik nishonlariga hujum qilish taqiqlanadi.
Izoh (0)