2024-yil 7-sentyabr kuni Toshkent shahrida O‘zbekiston Ekologik partiyasining V Forumi bo‘lib o‘tdi.
Forumda Qoraqalpog‘iston Respublikasi, viloyatlar va Toshkent shahridan saylangan delegatlar, O‘zbekiston Respublikasi Oliy Majlisi Qonunchilik palatasi deputatlari va Senati aʼzolari, partiyaning Markaziy Kengashi aʼzolari, davlat va jamoat, nodavlat tashkilotlar vakillari, ommaviy axborot vositalari xodimlari ishtirok etdi.
Forumda partiyaning avvalgi saylovlardagi dasturlarida ko‘zda tutilgan maqsad va tashabbuslarning amalga oshirilishi va yangi Saylovoldi dasturi muhokama qilindi.
O‘zbekiston Ekologik partiyasining Markaziy Kengashi Ijroiya qo‘mitasi raisi Abdushukur Hamzayev o‘zining nutqida 2020-2024-yillarga mo‘ljallangan saylovoldi dasturida belgilab olingan 80 dan ortiq vazifalarning deyarli barchasi bugungi kunga qadar amalga oshirilganligi, mamlakatimizda atrof-muhit holatini yaxshilash, ekologik muammolarni kompleks hal etishga yo‘naltirilgan dastur va harakatlar strategiyasini ilgari surish kabi keng ko‘lamli ishlarda partiyaning faol ishtiroki va munosib hissasini alohida eʼtirof etdi.
Shuningdek, forumda partiyaning yangi Saylovoldi dasturi muhokama qilindi.
Dasturida davlat tomonidan aholiga qulay shart-sharoitlar yaratish maqsadida mamlakatning yo‘l infratuzilmasi uchun ajratiladigan summaning muayyan qismini majburiy ravishda piyodalar yo‘lakchalarini tashkil etishga yo‘naltirish, avtomobil yo‘li qatnov qismi hisobidan skuterlar va velosipedlarda harakatlanish uchun alohida yo‘laklar tashkil etish, Toshkent shahri va viloyatlar markazlarida jamoat transportidan doimiy foydalanuvchi shaxslar uchun yo‘l haqini arzonlashtirib borish tizimini bosqichma-bosqich yo‘lga qo‘yish, ekologiya sohasidagi qonunchilik talablari ijrosini taʼminlashda davlat organlari va xo‘jalik yurituvchi subyektlar javobgarligini kuchaytirish kabi tashabbuslar ilgari surilayotganligi taʼkidlandi.
Shuningdek, Saylovoldi dasturida shaharlarda bino va ko‘p kvartirali uylar qurilishini majburiy tartibda jamoatchilik muhokamasidan o‘tkazish mexanizmlarini qonunda aniq belgilashning taklif etilayotganligi partiyaning o‘z asosiy g‘oyalari yo‘lida dadil qadam tashlayotganligini ko‘rsatmoqda.
Izoh (0)