Nurshod Xudoyberdiyev Namangan viloyati qishloq xo‘jaligi boshqarmasi boshlig‘i etib tayinlandi, deya xabar bermoqda viloyat hokimligi matbuot xizmati.
Tayinlovga qadar u 2019-yil mart oyidan boshlab 5 yil davomida Mingbuloq tumaniga hokimlik qilgan. U prezident Shavkat Mirziyoyev raisligida 17-iyul kuni o‘tkazilgan videoselektor yig‘ilishida faoliyatida tizimli kamchiliklarga yo‘l qo‘yganligi sababli lavozimidan ozod etilgan 10 nafar hokimdan biri bo‘lgandi.
18-iyul kuni bo‘lib o‘tgan yig‘ilishda Nurshod Xudoyberdiyev tuman faollari bilan xayrlashib, “Navqiron davrim shu yerda o‘tdi. Baqir-chaqir qilgan paytlarim bo‘lgandir, lekin hech kimga yomonlik qilmadim. Mingbuloqdan ketish men uchun og‘ir, juda og‘ir”, deb aytgandi.
Viloyat hokimligining xabarida aytilishicha, u 2024-yilning avgust oyiga qadar tuman hokimi bo‘lib ishlagan.
Nurshod Xudoyberdiyev mehnat faoliyati davomida Namangan viloyati “Suvnazorat” inspeksiyasida turli vazifalarda ishlagan. 2015—2016-yillarda Mingbuloq tumani Zardaryo irrigatsiya tizimi boshqarmasi boshlig‘i bo‘lgan. 2016—2017-yillarda Norin-Sirdaryo irrigatsiya tizimlari havza boshqarmasi boshlig‘ining birinchi o‘rinbosari, 2017—2019-yillarda Norin-Sirdaryo irrigatsiya tizimlari havza boshqarmasi boshlig‘i sifatida faoliyat ko‘rsatgan.
7-avgust kuni Mingbuloq tumani hokimi etib Ahror Mansurov tayinlangan.
Izoh (0)