Sven-Yoran Eriksson vidolashuv maktubini yozdi: “Meni samimiy inson sifatida eslab qoling”

Sven-Yoran Eriksson barcha uchun xayrlashuv murojaatini yozdi.

Angliya terma jamoasi va ko‘plab klublardagi faoliyati bilan mashhur bo‘lgan shvetsiyalik mutaxassisga yanvar oyida saraton kasalligining terminal bosqichi tashxisi qo‘yilgan edi.

“Yaxshi hayot kechirdim. O‘ylashimcha, hammamiz olamdan o‘tadigan kunimizdan qo‘rqamiz, lekin, hayot — bu o‘lim ham demakdir. Biz uni boricha qabul qilishni o‘rganishimiz kerak.

Siz meni qo‘lidan kelgan barcha ishni qilishga uringan samimiy inson sifatida eslab qolasiz, deb umid qilaman. Xafa bo‘lmang, tabassum qiling. Hammasi uchun rahmat, murabbiylar, futbolchilar, muxlislar. Hammasi ajoyib o‘tdi. O‘zingiz va hayotingiz uchun g‘amxo‘rlik qiling va unda yashang. Xayr!” deb yozdi murabbiy.

Ma’lumot uchun, murabbiy 1948-yili 5-fevral kuni Shvetsiyada tug‘ilgan. Faoliyati davomida “Benfika”, “Roma”, “Manchester Siti” kabi 10 dan ortiq klublar va Angliya, Meksika terma jamoalarini boshqargan.

Yanvar oyida onkologik kasallik tashxisi qo‘yilganida, murabbiy 1 yil umri qolganini aytgandi.