AQSHning Illinoys shtatidagi maktabning umumiy ovqatlanish xizmatlari sobiq direktori 9 yilga qamaldi. Ayol 1,5 million dollarlik tovuq qanotchalarini o‘g‘irlashda aybdor deb topildi. Bu haqda ABC 7 Chicago xabar berdi.
66 yoshli Vera Liddell Harvi okrugidagi 152-sonli maktab o‘quvchilari uchun oziq-ovqat sotib olgan. Ushbu lavozimdan foydalanib, u firibgarlik sxemasini tashkil qilgan. 2020-yildan 2022-yilgacha ayol mahalliy ta’minotchidan tovuq qanotchalarini buyurtma qilgan, ammo natijada mahsulotlar maktab o‘quvchilariga yetib bormagan.
“Ommaviy firibgarlik COVID-19 avjiga chiqqan paytda, o‘quvchilarga maktabda jismoniy ishtirok etishga ruxsat berilmaganda boshlangan. Bolalar masofadan o‘qiganiga qaramay, maktab okrugi o‘quvchilarni oilalari olib ketishi mumkin bo‘lgan oziq-ovqat bilan ta’minlashni davom ettirgan”, deyiladi sud hujjatlarida.
Tekshiruv davomida Liddellning jinoiy sxemasi fosh etilgan. Audit shuni ko‘rsatdiki, maktabning oziq-ovqat xizmati bo‘limi o‘quv yilining yarmi tugagan bo‘lsa-da, yillik byudjetini 300 ming dollardan oshirgan.
Okrug ish boshqaruvchisi tovuq qanotchalari uchun hisoblarni aniqlagan, ammo sud hujjatlarida aytilishicha, bu taom odatda maktab o‘quvchilariga tortilmaydi, chunki uning suyaklari bor. Liddell qanotchalarni boshqa oziq-ovqatlardan alohida buyurtma qilib, maktablardan birining furgonida olib ketgan. Ikki yil ichida ayol 11 ming quti tovuq oyoqchalarini o‘g‘irlagan.
Izoh (0)