AQSH hukumati 13-avgust kuni Isroilga 20 milliard dollarlik qurol sotish to‘g‘risidagi bitimni maʼqullagan. Bu haqda Reuters nashri xabar berdi.
![](/static/2024/08/14/Reuters-scaJV-7M.jpg)
10 oydan ortiq vaqtdan beri davom etayotgan Yaqin Sharq operatsiyasida Isroilni qo‘llab-quvvatlash va harbiy ustunlik kuchi bilan urushni tezroq tugatish maqsadida so‘nggi kelishuv tasdiqlangan. Endilikda AQSHdan Isroilga yordam paketlari bo‘lmasligi, qurol-yarog‘ kelishuvlari savdo paketi formatiga o‘tkazilishi xabar berilgan.
Savdo paketi zamonaviy qiruvchi samolyotlar, mudofaa tizimlari va o‘rta masofali raketalarni o‘z ichiga olishi xabar berilgan. Savdo bitimining to‘liq tafsilotlari ochiqlanmagan. Pentagon harbiy texnikalarni qachon yetkazib berishi ham hozircha aniq emas.
“ AQSH davlat kotibi Entoni Blinken qariyb 19 milliard dollarlik F-15 samolyotlari va jihozlari, 774 million dollarlik tank patronlari, 60 million dollarlik portlovchi minomyot patronlari va 583 million dollarlik armiya mashinalari sotilishini maʼqulladi. Paketda ,shuningdek, boshqa hujum va mudofaa tizimlari bo‘ladi”, deyiladi Pentagon bayonotida.
Pentagonning ayrim anonim manbalari F-15 lar 2026-yilning boshida yetkazib berilishini aytgan. Isroil bilan bog‘liq xavfsizlik holatining o‘zgarishiga qarab bu muddat oldinga surilishi ham mumkin.
“Qo‘shma Shtatlar Isroil xavfsizligini taʼminlash tarafdori va Isroilga o‘zini-o‘zi mudofaa qilish qobiliyatini rivojlantirish va saqlab turishda yordam beradi. Bu AQSH milliy manfaatlari uchun ham juda muhimdir”, deyilgan Pentagon bayonotida.
Isroil mudofaa vaziri Yoav Gallant X tarmog‘idagi postida AQSH rasmiylariga Isroilga “mintaqadagi sifatli harbiy ustunligini” saqlab qolishda yordam bergani va Isroil xavfsizligiga sodiqligi uchun minnatdorchilik bildirgan. Bu hamkorlik yangi surʼatda davom etishiga umid bildirgan.
Manbalarga ko‘ra, AQSH iyun oyidan beri Isroilga 10 000 dan ortiq o‘ta vayron 2000 funtli bombalar va minglab Hellfire raketalarini yuborgan. Biroq G‘azoda bu kabi qurollar juda kam holatda qo‘llanmoqda. Tahlilchilar Isroil Eron va uning hamkorlari hujumiga munosib qarshi turish uchun ulkan harbiy ombor shakllantirayotgan bo‘lishi mumkinligini taxmin qilgan.
Izoh (0)