Ukraina hozirda Rossiyaning Kursk viloyatida 1000 kvadrat kilometrdan oshiq hududni nazorat qilmoqda. Bu haqda Ukraina bosh qo‘mondonligi bergan maʼlumotga asoslanib, BBC nashri xabar berdi.
Ukraina harbiy qo‘mondonligi Kursk operatsiyasi 7 kundan beri davom etayotganini xabar bergan. Viloyat ichkarisida yirik rus harbiy qismlari kech joylashtirilgani uchun Ukraina brigadalari viloyatda mustahkam o‘rnashishga ulgurgani aytilgan.
Ukraina bosh qo‘mondoni Aleksandr Sirskiy Rossiyaning Ukrainadagi ikki yarim yillik bosqini endi uning o‘z yerlariga qaytayotganini aytgan. Mavjud vaziyat tufayli Rossiya istasa ham Kurskdagi ukrain bo‘linmalarni tezda yo‘q qilolmasligi taʼkidlangan.
Rus mahalliy nashrlariga ko‘ra, Rossiya hukumati g‘arbiy viloyatlardan aholini evakuatsiya qilishni faol davom ettirmoqda. Hozirgacha 121 ming kishi ko‘chirilgan. Yana 59 ming kishini ko‘chirish rejalashtirilmoqda.
Kursk mahalliy gubernatori hududdagi 28 ga yaqin qishloq Ukraina qo‘shinlari qo‘liga o‘tgani, 12 nafar tinch aholi vakili halok bo‘lgani va vaziyat og‘irligicha qolayotganini xabar bergan. 12-avgust tunida ukrain bo‘linmalari Kursk ichkarisiga 30 kilometrgacha kirib borgan.
Kreml rasmiylari 2 mingga yaqin fuqaro Ukraina bosib olgan hududlarda qolib ketgani haqida xabar bergan. Ayni paytda ular bilan bog‘lanish uchun hech qanday imkoniyat mavjud emas.
Rossiya hukumati Kurskka kirgan ukrain batalyoni 1000 nafar askardan iborat ekanini bildirgan. Ukraina tomoni esa bu bayonotni rad etib, askarlar soni bir necha ming nafarga yetishini aytgan, aniq raqamlar oshkor qilinmagan.
Ayni paytda ming kilometr kvadrat hududda ukrain bo‘linmalari mustahkam o‘rnashgani maʼlum. Ular strategik nuqtalarni, jumladan Sudja gaz taqsimlash punktini egallab olgani bois qarshi hujum uyushtirish kechikmoqda.
Izoh (0)