Boks bo‘yicha Qozog‘iston terma jamoasi barcha murabbiylarini iste’foga chiqardimi? Federatsiya bu borada bayonot berdi

Boks bo‘yicha Qozog‘iston terma jamoasi barcha murabbiylarini iste’foga chiqardimi?

Qozog‘iston boks federatsiyasi rasmiy sahifasida xabar chiqdi va darhol o‘chirildi. Unda federatsiya vitse-prezidenti Aziz Kojambetov va boks terma jamoasining barcha murabbiylari iste’foga chiqarilganini yozilgan edi, deya xabar beradi Tengri Sport. 

“Boks bo‘yicha Qozog‘iston erkaklar terma jamoasining Parijdagi Olimpiada o‘yinlarida qoniqarsiz natijalari tufayli quyidagi mutaxassislar o‘z lavozimlaridan ozod etilganini e’lon qilamiz: Qozog‘iston boks federatsiyasi vitse-prezidenti Aziz Kojambetov”, — deb yozilgandi o‘chirilgan xabarda.

Shuningdek, iste’foga chiqarilganlar orasida terma jamoa murabbiylarining to‘liq tarkibi ham keltirilgandi:

Bosh murabbiy — Mirzagali Aytjanov, katta murabbiy — Marat Jakiyev, murabbiy — Nurken Andasov, murabbiy Nurjan Nasanov, murabbiy — Gani Ashkeyev, murabbiy Ermek Ertayev, murabbiy — Talg‘atbek Jakpekov, murabbiy — Zakir Safiulin, murabbiy Azamat Makajanov, murabbiy — Jamil Jusip, maslahatchi murabbiy — Donatas Yanyusyavichus.

Ushbu xabar federatsiyaning rasmiy sahifasida bir necha soniya turgan va darhol o‘chirilgan. Biroq ijtimoiy tarmoqlarda xabar skrinlari tarqalgan.

Federatsiya ushbu mutaxassislarning hech biri iste’foga chiqarilmaganini, lekin keyinchalik o‘zgarishlari bo‘lishini ma’lum qilgan.

“Ha, biz bu xabarni tasdiqlamaymiz. Boksda o‘zgarishlar bo‘ladi, yaqin orada o‘z rasmiy sahifalarimizda e’lon qilamiz”, — deyiladi federatsiya matbuot xizmati xabarida.

Avvalroq Qozog‘iston boks federatsiyasi prezidenti Shahmurat Mutalip ham islohotlar to‘g‘risida gapirib o‘tgan. U Olimpiya bahslari terma jamoaning xato va kamchiliklarini ko‘rsatib berganini ta’kidlagan.

“Biz to‘liq mas’uliyatni o‘z zimmamizga olamiz va bahona qilishni istamaymiz. Barchamiz aybdormiz. Federatsiya ham, murabbiylar ham. Hammamiz o‘z xatolarimizni, kamchiliklarini ko‘rib, Qozog‘iston boks federatsiyasiga katta islohotlar kerak, degan xulosaga keldik”, — prezidentning so‘zlaridan iqtibos keltiradi Orda kz. 

Eslatib o‘tamiz, boks bo‘yicha Qozog‘iston terma jamoasi Olimpiadada bitta kumush va bitta bronza medalini olishga muvaffaq bo‘ldi.