Markaziy Osiyo mamlakatlari orasida davlat qarzining eng yuqori ko‘rsatkichi Qozog‘istonda, eng past ko‘rsatkich Tojikistonda qayd etilgan.
Joriy yilning 1-yanvar holatiga O‘zbekiston davlat qarzi qoldig‘i 34,9 milliard AQSH dollarini tashkil etdi. Shundan 29,6 milliard dollari tashqi, 5,3 milliard dollari ichki qarz hisoblanadi. Respublika Markaziy Osiyo mamlakatlari orasida davlat qarzi miqdori bo‘yicha ikkinchi o‘rinni egallagan.
2024-yil 1-yanvar holatiga Qozog‘iston davlat qarzi 105 milliard dollarni tashkil etgan. Qirg‘iziston davlat qarzi esa 6 milliard dollar, Turkmanistonniki 4,5 milliard dollar, Tojikistonga tegishli davlat qarzdorligi 3,6 milliard dollar.
Markaziy Osiyo davlatlarining strategik hujjatlarida davlat qarzi darajasining maksimal chegaralari ko‘rsatilgan. Xususan, Qozog‘iston davlat qarzi mamlakat yalpi ichki mahsulotining 27 foizidan oshmasligi belgilangan. Shu bilan birga, Qirg‘izistonda davlat qarzi miqdorini YIMning 70 foizidan, Tojikiston va O‘zbekistonda esa 60 foizidan oshirmaslik ko‘zda tutilgan.
2023-yilda Markaziy Osiyo davlatlari yalpi ichki mahsulotlari hajmi quyidagi hajmlarni tashkil etgan:
- Qozog‘iston — 259,3 milliard dollar;
- O‘zbekiston — 101,6 milliard dollar;
- Turkmaniston — 81,8 milliard dollar;
- Qirg‘iziston — 12,6 milliard dollar;
- Tojikiston — 10,8 milliard dollar.
Iqtisodiyot va moliya vazirligi tahliliga qaraganda, O‘zbekiston davlat qarzi 2024-yilda yalpi ichki mahsulotga nisbatan 37 foiz atrofida bo‘lishi kutilmoqda. 2025-yilga borib bu ko‘rsatkich 37,4 foizga, 2026-yilda 37,9 foiz atrofida bo‘lishi prognoz qilingan.
Izoh (0)