Bahodir Jalolov navbatdagi Olimpiadada qatnashadimi?

Parijda Olimpiadaning boks musobaqasida asosiy bahslar bo‘lib o‘tmoqda.

Ushbu bosqichda O‘zbekiston delegatsiyasi muvaffaqiyatli qatnashmoqda. Erkaklar jamoasining uch a‘zosi — Hasanboy Do‘stmatov, Lazizbek Mullajonov hamda Asadxo‘ja Mo‘ydinxo‘jayev finalga yo‘l oldi. 

Yana ikki bokschi o‘zining yarim finaldagi bahsida qatnashishga tayyorgarlik ko‘rmoqda. Bahs oldidan “Sports.uz” nashri Bahodir Jalolovdan medallar uchun bahsda eng asosiy raqibi deb qaralgan, ammo ilk bahslardayoq mag‘lub bo‘lgan qozog‘istonlik Kamshibek Kunkabayev haqida so‘radi.

“Biz Qamshibek bilan do‘stmiz. Men uning mag‘lubiyatidan juda xafa bo‘ldim. Qamshibek bilan finalda kuch sinashishni rejalashtirgan edik. Unga kelasi ishlarida omad va muvaffaqiyatlar tilayman. Qamshibek Qozog‘iston nomini jahon arenalarida tanitgan sportchilardan biri”.

Bahodir Jalolov O‘zbekiston termasidan nechta oltin medal kutayotganini aytdi.

“Beshta oltin medal olmoqchimiz. Hozircha uch nafar bokschimiz finalga yo‘llanma oldi. Endi finalga chiqish navbati men va Abdumalik Halokovda. O‘z janglarimizda g‘alaba qozonishga harakat qilamiz”.

Sportchi musobaqadan keyin professional boksga bor e’tiborini qaratadi.

“Keyingi Olimpiadada qatnashmayman. Bundan keyin to‘liq professional boksga o‘taman”.

Ma’lumot uchun, bugun, 7-avgust kuni Bahodir Jalolov yarim final bahsida qatnashadi. 

Professional boksda 14 ta jang o‘tkazgan o‘zbek bokschisi janglarning barchasida raqiblarini nokautga uchratgan.