“Olimpiya qishlog‘i juda tartibsiz”. Ispaniyalik murabbiy yashash sharoitini tanqid qildi

Ispaniyalik suzish bo‘yicha murabbiy Serxio Lopes Parijdagi Olimpiya shaharchasidagi yashash sharoitlari haqida fikr bildirdi.

“Olimpiya qishlog‘i tartibsiz. Avvaliga ovqat yo‘q edi. Deylik, tovuq tugab qolsa, ular sizga yo‘qligini aytishmaydi, lekin yana keltirishmaydi ham. Ular tovuq tugaganini aytishdan qo‘rqadi. Islandiyadalik suzuvchi kir yuvish uchun soat 9:30 da ketdi, unga bu paytda buni qila olmasligini, boshqa binoga borishini aytishdi. Aytilgan binoga borganda eshik yopiq edi. Odamlar terlaydi va toza kiyimga muhtoj.

Transport xizmati ham juda yomon. Havo juda issiq, avtobuslar konditsionersiz. 30 daqiqalik manzilga bir yarim soatda yetib bordik. Haydovchi adashib qoldi. Garov bog‘lashim mumkin, haydovchilar Parijdan emas. Odamlar avtobus polida o‘tirishdi. O‘rindiqlar soni yetarli emas edi. Matbuot bu haqda gapirmaydi. Men fransuzlar o‘z g‘ururi uchun musobaqani yuqori saviyada o‘tkazishini kutgandim”, deya ispaniyalikning so‘zlarini keltiradi Relevo.

55 yoshli Lopes 1988-yilda Seulda (Janubiy Koreya) bo‘lib o‘tgan Olimpiadaning 200 m masofaga brass usulida suzish bo‘yicha bronza medali sovrindori hisoblanadi. U sportchi va murabbiy sifatida yettita yozgi Olimpiya o‘yinlarida qatnashgan.