O‘zbekistonda ish haftasining oxirida issiq kuchayishi kutilmoqda

O‘zbekiston hududi bo‘yicha 5-7-avgust kunlari o‘rtacha issiq ob-havo saqlanib turadi, deb xabar bermoqda “O‘zgidromet”. 

Harorat asosan 36-39 daraja, respublika shimoli, janubi va cho‘l hududlarida 40-42 darajagacha issiq bo‘ladi. 8-9-avgustda issiq kuchayadi va respublika hududining katta qismida kunduz kunlari havo 40-42 darajagacha, janubda 43-44 darajagacha isiydi.

Faqat O‘zbekistonning shimoli-g‘arbiy hududlariga 9-avgust kuni salqin havo kirib kelishi boshlanadi, buning hisobiga Qoraqalpog‘iston Respublikasi va Xorazm viloyatida harorat 32-37 darajagacha pasayadi.

Ushbu kunlarda O‘zbekiston hududi bo‘yicha quruq va asosan kam bulutli ob-havo bo‘lishi saqlanib turadi. Faqat 5-6 va 9-avgust kunlari Farg‘ona vodiysi viloyatlarining tog‘ oldi va tog‘li hududlarida baʼzi joylarda va Toshkent viloyatining ayrim tog‘li hududlarida qisqa muddatli yomg‘ir yog‘ishi, momaqaldiroq bo‘lishi mumkin.

Shamol 7-12 m/s tezlikda esadi, baʼzi joylarda 13-18 m/s gacha kuchayadi, chang-to‘zonlar bilan kuzatiladi.

Toshkent shahrida havo asosan kam bulutli bo‘ladi, yog‘ingarchilik kutilmaydi. Shamol sharqdan 3-8 m/s tezlikda esadi, baʼzi joylarda 8-10 m/s gacha kuchayadi.

Harorat kechalari 23-25 daraja, kunduz kunlari 5-7-avgustda 37-39 daraja, 8-9-avgustda 39-41 daraja issiq bo‘ladi.