Yonilg‘i-energiya resurslaridan foydalanish ustidan davlat nazoratini samarali tashkil etish va muvofiqlashtirish bo‘yicha respublika hamda hududiy shtablar tomonidan energiya resurslarni talon-toroj qilinishini fosh etishga qaratilgan nazorat tadbirlari davom etmoqda, deb xabar berdi Bosh prokuratura matbuot xizmati.
Xususan, Andijon shahridagi “Z.B.H.” MCHJ rahbari R.X. jamiyatga qarashli dori-darmon ishlab chiqarish sexida o‘rnatilgan hisobga olish uskunasi parametrlariga tashqi taʼsir ko‘rsatib, 745 million so‘mlik 828 ming kVt soat elektr energiyasini o‘g‘irlagan.
Mazkur holat yuzasidan “Z.B.H.” MCHJ mansabdor shaxslariga nisbatan Jinoyat kodeksining 169-moddasi 4-qismi “a” bandi (o‘g‘rilik) bilan jinoyat ishi qo‘zg‘atilib, gumonlanuvchi shaxs protsessual tartibda ushlangan.
Aprel boshlarida Surxondaryo viloyatining Denov, Qashqadaryo viloyatining Muborak hamda Farg‘ona viloyatining Marg‘ilon shahrida gazdan noqonuniy foydalanish holatlari fosh etilgan, Andijonda 1,3 mlrd so‘mlik elektr energiyasidan noqonuniy foydalangan ishlab chiqarish sexi aniqlangani to‘g‘risida xabar berilgan edi.
“O‘zenergoinspeksiya”ga ko‘ra, O‘zbekistonda so‘nggi bir oyda energiya resurslaridan noqonuniy foydalanishlar natijasida davlat manfaatlariga 234 milliard 778 million so‘mlik zarar yetkazilgan.
Izoh (0)