O‘zbekistonda gidrotexnika inshootlarida favqulodda holatlar vujudga kelganda yetkazilgan zarar o‘rnini qoplash tartibini belgilash to‘g‘risida Vazirlar Mahkamasi qarori qabul qilindi.
Unga ko‘ra, gidrotexnika inshootlariga suv omborlari to‘g‘onlari, daryolardagi to‘g‘onlar, soylar, kanallar va kollektorlar, daryo o‘zanlarini to‘sib qo‘yadigan inshootlar, suv olish, suv o‘tkazgich, suv oqimi va qirg‘oqni himoya qilish inshootlari, gidroelektr stansiyalari, nasos stansiyalari kiritilgan.
Favqulodda vaziyat gidrotexnika inshootlarida odamlar qurbon bo‘lishiga, ularning sog‘lig‘i yoki atrof tabiiy muhitga zarar yetishiga, jiddiy moddiy talafotlarga hamda odamlarning hayoti va faoliyati sharoiti buzilishiga olib kelgan avariya, halokat, xavfli tabiiy hodisa, tabiiy ofat yoki boshqa ofat natijasida yuzaga kelgan holatdir.
Hujjat bilan quyidagilar tasdiqlandi:
- gidrotexnika inshootlaridan foydalanishda fuqarolarning mol-mulkiga, sog‘lig‘iga va (yoki) mol-mulkiga, shuningdek, atrof-muhitga avariya natijasida yetkazilgan zarar uchun foydalanuvchi tashkilotlarning fuqarolik javobgarligini sug‘urta qilish tartibi;
- favqulodda vaziyatlar natijasida gidrotexnika inshootlaridan foydalanishda aholining hayoti va sog‘lig‘iga hamda yuridik shaxslarning mol-mulkiga yetkazilgan zarar miqdorini hisoblash tartibi.
Shuningdek, fuqarolik javobgarligi sug‘urta qilinishi lozim bo‘lgan 59 ta gidrotexnika obyektlarining ro‘yxati tasdiqlandi.
Sug‘urta shartnomasi gidrotexnika inshootlaridan foydalanuvchi tashkilotning tashabbusi bilan sug‘urtalovchi tomonidan belgilangan shaklda tuziladi.
Gidrotexnika inshootlaridan foydalanishda favqulodda vaziyatlar natijasida yetkazilgan zararni sug‘urtalashning minimal miqdori ularning sinfiga qarab belgilanadi:
- I sinf — 250 000 BHM;
- II sinf — 50 000 BHM;
- III-IV sinf — 10 000 BHM.
Zarar miqdorini baholash Favqulodda vaziyatlarning oldini olish va ularni bartaraf etish bo‘yicha hukumat komissiyasi yoki hududiy komissiyalar tomonidan belgilanadi.
Izoh (0)