Germaniya hukumati mahalliy musulmonlar uyushmasini radikal g‘oyalarga berilish ayblovi ortidan taqiqlab qo‘ydi. Bu haqda Germaniya Ichki ishlar vazirligi 24-iyul kuni bergan maʼlumotga asoslanib, Reuters nashri xabar berdi.
Manbada aytilishicha, “Gamburg musulmonlari markazi” uyushmasi va uning sho‘ba tashkilotlari faoliyati butun mamlakatda taqiqlangan. Tashkilot radikal islomiy maqsadlarni ko‘zlab targ‘ibot olib borishda gumonlangan.
Germaniya politsiyasi mamlakatning sakkiz shtatida uyushmaga aloqador 55 ta binoda sud qarori asosida tintuv o‘tkazgan. Tergov tugagunga qadar uyushma faoliyati to‘xtatilgan. Tashkilotning Frankfurt, Myunxen va Berlindagi bo‘limlari yopilgan.
Politsiya uyushma tasarrufidagi masjidlarda ham reydlar o‘tkazgan. Jumladan, Gamburgdagi eng qadimiy masjidlardan birida politsiya uzoq tintuv amalga oshirgan.
Manbada aytilishicha, tashkilot tarkibi asosan islomning shia oqimiga mansub shaxslardan iborat bo‘lgan. Tintuvlardan so‘ng shialar ibodat qiladigan 4 ta masjid butunlay yopib qo‘yilgan.
“55 ta obyektda o‘tkazilgan tintuv natijalari bugun “Gamburg musulmonlari markazi” (“Islamisches Zentrum Gamburg”) nomi bilan mashhur bo‘lgan uyushmaning taqiqlanishiga olib keldi. Biz Germaniyada islomiy-ekstremistik, totalitar mafkurani targ‘ib qiluvchi guruh faoliyatiga nuqta qo‘ydik”, deyiladi Germaniya ichki ishlar vaziri Nensi Fazer bayonotida.
Tergovchilar guruh mafkurasini inson qadr-qimmati, ayollar huquqlari, mustaqil sud tizimi va demokratik hukumat tamoyillariga zid deb topgan. So‘nggi o‘rganishlar shia oqimining Germaniyada tinch amaliyotiga mutlaqo taalluqli emasligini ko‘rsatgani aytilgan.
Ichki ishlar vazirligi guruh rahbarlari Eron bilan aloqada bo‘lganini maʼlum qilgan. Ular Germaniyada teokratik boshqaruvni yaratadigan islom inqilobini amalga oshirishga tayyorgarlik ko‘rishda ayblangan.
Izoh (0)